امریکہ ٹی پاکستانی سفیر ڈاکٹراسد مجید تینا ٹیم اتون اوار مسافرآتے سپارا
اسلا آباد۔ 11 مئی (اے پی پی) قومی ایئر لائن پی آئی اے نا امریکہ غان اولیکو ریلیف جہاز 200مسافر آتے اتسا وطن آ پدی رادہ مس۔ پی آئی اے نا ترجمان نا کنڈآن جاری اعلامیہ نا رداٹ پی کے 8722امریکہ نا دارالحکومت واشنگٹن ڈی سی آن اسلام آباد کن رادہ مسنے ہرا پاکستانی وخت انا رداٹ 4بجہ ءُ 11 منٹ آ رادہ مس و کم و ود 13گھنٹہ ٹی براہ راست پاکستان آ سرمریک۔ امریکہ ٹی پاکستانی سفیر ڈاکٹر اسد مجید تینا ٹیم اتون اوار مسافر آتا سپارنگ کن تینٹ بالی پٹ آ ساڑی ئس۔ پی آئی اے امریکہ ٹی اختہ پاکستانی تے پدی اتنگ کن خصوصی موکل ہلکوسس۔ سی ای او ایئر مارشل ارشدملک خصوصی وڑاٹ وزیر ہوابازی غلام سرور خان و پاکستانی سفیر ڈاکٹر اسد نا منتو اری ءِ ہرفے۔ اوپارے کہ غٹ قومی ادارہ غاک پورو یکجہتی و یکسوئی اٹ ملک انا خاطر دا آپریشن اٹی بشخ ہلنگ ءُ۔ آخیریکو پاکستانی نا وطن آ پدی بننگ اسکان پی آئی اے نا مچ آ دنیا غان خصوصی جہاز آتا چرجوئی برجاسلک۔
