اسلام آباد۔ 11 مئی (اے پی پی) وزیر مملکت موسمیاتی بدلی زرتاج گل پارینے کہ اومیت کیوہ کہ پارلیمان نا دیوان اٹی اپوزیشن مثبت سوچ و رویہ نا درشانی ءِ کیک، کنا حلقہ گچین کاری ڈیرہ غازی خان آن برمتہ مروک ہنکینی چنانا بازیابی آ ڈی پی پی ڈیرہ غازی خان و سی آئی اے کوئٹہ داد انا حقدار ءُ۔ دوشنبے نادے آ تینا ٹویٹ اٹی زرتاج گل پارے کہ اومیت ءِ کہ پارلیمان نا بٹنگوک آ سیشن اٹی اپوزیشن مثبت سوچ و رویہ نا درشانی ءِ کیک و وعدہ نا رداٹ کورونا نا سرحال آ ہیت مریک۔ داخہ در مشکل حالیت آتے ٹی ہم حکومت گچین لائحہ عمل اس جوڑ کرسا زرگزران نا پہیہ ءِ چلیفنگ ءِ۔ اوپارے کہ ننا غٹ پالیسی تا وت قوم انا گچینی و فلاحءِ۔ زرتاج گل پارے کہ ڈیرہ غازی خان نا علاقہ تھانہ گدائی آن برمتہ مروک چناءِ وخت آ کارروائی کرسا 31گھنٹہ ٹی بلوچستان آن بازیاب کرفنگ آ ڈی پی او اختر فاروق، ایس پی انویسٹی گیشن حفیظ الرحمان نا ٹیم و سی آئی اے کوئٹہ داد انا حقدار ءُ۔
