جہانی بینک سمارٹ پنجاب پروگرام نا کمک اٹ صوبہ ٹی فصل غاتا پیدوار اٹی ودکی،غذائی سلامتی و لائیو اسٹاک نا بشخ اٹی جدت اتنگ کن تینا کڑد ءِ برجاتخک، کنٹری ڈائریکٹر الانگوپیچوموتو

اسلام آباد۔ 11مئی (اے پی پی) پاکستان اٹی جہانی بینک انا کنٹری ڈائریکٹر الانگوپیچوموتو پارینے کہ پنجاب اٹی فصل آتا پیدوار اٹی ودکی و فوڈ سیکورٹی ءِ پک کننگ نا کوشست آتے ٹی جہانی بینک تینا کڑدءِ برجاتخک۔ دوشنبے نادے آ راجی رابطہ نا ویب سائٹ ٹویٹر آ جاری کلہو و منسلکہ آرٹیکل اٹ اوپارینے کہ پنجاب اٹی کشارگری و فوڈ سیکورٹی نا پوسکن آ دور بناکرینے، صوبہ ٹی دا ہیت ءِ پک کننگ انگ ءِ کہ کشارگر آتا اوفتا فصل آتیان زیات کٹیا و صارف آتے گچین خور فراوان مننگ کے۔ اوپارے کہ جہانی بینک سمارٹ پنجاب پروگرام نا کمک اٹ صوبہ ٹی فصل آتا پیدوار اٹی ودکی، غذائی سلامتی و لائیو اسٹاک نا بشخ اٹی جدت اتنگ کن تینا کڑدءِ برجاتخک۔ سمارٹ پروگرام نا رداٹ متعین کروک اہم ہدف آتے ٹی کشاری پیدوار اٹی ودکی، لائیو اسٹاک نا پیدوار اٹی ودکی و چنکا کشار گر و بزغر آتے چاگڑدی بدلی تا چیلنج آتون مون تننگ نا لائخی تیٹی ودکی اوار ءِ۔ داکان بیدس ویلیو ایڈیشن، وویلیو چین و بزنس ماڈل نا بدلی ہم دا پروگرام نا اہم ٹک آتے ٹی اوار ءِ۔ یات سلے کہ سمارٹ پروگرام آن بیدس ہم صوبہ ٹی جہانی بینک انا کمک اٹ بھلا ڈٹ آتیا کاریم برجاءِ۔ دافتے ٹی پنجاب ٹورزم فاراکنامک گروتھ، ڈیزاسٹراینڈ کلائمیٹ ریزیلینس امپروومنٹ و پنجاب گرین ڈویلپمنٹ پروجیکٹ اوار ءُ۔