لاک ڈاؤن اٹی نرمی نا اولیکو مسہ دے بے کچ اہم ءُ، صوبہ غاک ایس او پی تیا سختی اٹ عملدرآمد ءِ پک کیر، بنجائی وزیر ڈٹ بندی، شونداری، اصلاحات وخصوصی گام گیج اسد عمر نا دیوان آن تران

اسلام آباد۔ 11مئی (اے پی پی) بنجائی وزیر ڈٹ بندی، شونداری، اصلاحات و خصوصی گام گیج اسد عمر پارینے کہ لاک ڈاؤن اٹی نرمی نا اولیکو مسہ دےبے کچ اہم ءُ،صوبہ غاک ایس اوپی تیا سختی اٹ عملدرآمد ءِ پک کیر تانکہ کوویڈ۔ 19نا توننگ کن حکومت نا گام گیج آک زہمی مفس۔ داخیال آتا درشانی ءِ او دوشنبے نادے آ اہم دیوان اٹی کرے۔ نیشنل کمانڈ اینڈ آپریشن سینٹر(این سی او سی) ٹی صوبائی حکومت آک بشمول آزاد جموں و کشمیر و گلگت بلتستان نا کماش آتا تین پہ تینی سلابت اٹ کوویڈ۔ 19نا تالان مفننگ و رکھی بست وبند آتے پک کننگ کن قومی کوشست آک ترندی اٹ برجاءُ۔ دا چرجوئی ٹی بنجائی وزیر ڈٹ بندی،شونداری، اصلاحات و خصوصی گام گیج اسد عمر نا کماشی ٹی دیوان اٹی این سی او سی نا 9مئی آن پد انا حالیت ، صوبہ غاتاروچہ نا بابت گائیڈلائنز آتیا عملدرآمد ، روچہ نا آخیریکو عشرہ کن تیاری تا جاچ و کوویڈ۔ 19نا بابت حساب وکتاب تیا سجفنگا۔ صوبائی حکومت آک بشمول گلگت بلتستان و آزاد کشمیر حکومت نا نمائندہ غاک روچہ نا آخیریکو عشرہ کن تیاری تا بابت دیوان ءِ معلومدار کرے۔ بنجائی وزیر اسد عمر پارے کہ لاک ڈاؤن اٹی نرمی نا اولیکو مسہ دے بے کچ اہم ءُ۔ صوبہ غاک ایس او پی تیا عملدرآمد ءِ پک کیر تانکہ کوویڈ۔ 19نا توننگ کن حکومت نا گام گیج آک زہمی مفس۔ چیف کمشنر اسلام آباد، آزاد جموں وکشمیر و گلگت بلتستان و صوبہ غاتا چیف سیکرٹریز آک ویڈیو لنک انا کمک اٹ کانفرنس وخت اس کہ بنجائی وزیر داخلہ بریگیڈیئر (ر) وزیراعجاز احمد شاہ ، وزیر صنعت وپیداوار حماد اظہر، وزیر قومی خور رکھ سید فخر امام، وزیر معاشی امور خسروبختیار، وزیراعظم نا خصوصی کمکار جان جوڑی ڈاکٹر ظفرمرزا، خصوصی گام گیج قومی سلامتی ڈاکٹر معید یوسف ، وزیراعظم نا سلاہکار واپار ٹیکسٹائل و زرکاری عبدالرزاق داؤد و ایلوفک ہم دیوان اٹی ساڑی ئسر۔