حکومت نا پیشن نا ملک آتے ٹی اختہ مروک آ پاکستانی تے پدی اتنگ کن بھلو فیصلہ اس
اسلام آباد۔ 11 مئی (اے پی پی) حکومت پاکستان پیشن نا ملک آتے ٹی اختہ مروک پاکستانی تا پدی اتنگ کن بھلو و اہم ءُ فیصلہ اس کرسا قرنطینہ آسراتی تا بابت پالیسی ٹی پین لچک ودی کرینے، پیشن نا ملک آتیان بروک آ پاکستانی تے کوروناٹیسٹ اکن 48گھنٹہ کن انتظار کروئی تمپک ، پوسکن آ پالیسی دمدستی وڑاٹ نافذ العمل ءِ، دا پالیسی نا رداٹ ہفتہ ٹی 10آن 11ہزار پاکستانی تے وطن آ پدی اتنگ مریک۔ وزیراعظم عمران خان نا پیدوار پارت ءِ کہ زوت آن زوت و زیات آن زیات پاکستانی تے وطن آ پدی اتنگے، ہندا ہفتہ امریکہ، برطانیہ ، کینیڈا، افریقہ و خلیجی ملک آتیان پین پاکستانی تے پدی اتنگک۔ سیالکوٹ بالی پٹ و کوئٹہ بالی پٹ ءِ ہم دا رداٹ کاریم اٹ اتنگک۔ دوشنبے نادے آ وزیراعظم نا خصوصی کمکار قومی سلامتی امور ڈاکٹر معید یوسف میڈیا ءِ حوال ترسا پارے کہ دا مچ آ پالیسی نا وت اسہ بندغ اسے ہرانا زند اٹی مون تروک مشکل آتے آسان کننگ وزیراعظم نا بنداوی ٹک ءِ، اینو نا حوال اٹی ہمو غٹ ابہام مر مسر ہراکہ بھاز انگا خلقت نا ذہن تیٹی ئسر۔ دا پوسکن آ حکمت عملی نا رداٹ داسہ زیات کچ اٹی پاکستانیک پدی بننگ کیرہ۔ اوپارے کہ پردیسی تیکن خوشخبری ءِ کہ اوفتے پدی اتنگ کن پالیسی ٹی پین لچک اتنگانے، پوسکن آ پالیسی نا رداٹ پیشن نا ملک آتیان بروک آ پاکستانی تیکن کورونا ٹیسٹ اکن 48گھنٹہ نا پابندی چٹا، ٹیسٹ رپورٹ منفی بننگ تون اوار اوار ہندن ءُ مثبت کیس ہرافتے ٹی علامت آک ظاہر مفننگ ءُ اوفتے صوبائی حکومت آک جان جوڑی نا چاہندار آتا ایڈوائس آ سیلف کوارنٹین کن اُراتیاگدریفنگ کیرہ، 11مئی آن ہر کس کہ پیشن نا ملک آن پاکستان آ بریک او دمدستی وڑاٹ حکومتی قرنطینہ یا تینا جندانا خڑچ آ ہوٹل اٹ سرمریک ہراڑے اولیتی بنداو تیا اونا ٹیسٹ ءِ کننگک، ٹیسٹ انا رزلٹ ءِ ہم زوت پک کننگک۔ ڈاکٹر معیدیوسف پارے کہ پیشن اختہ مروک پاکستانیک ننا پالیسی نا محورو مرکز ءُ، پوسکن آ پالیسی نا رداٹ دین انا تالان مفننگ ءِ پک کرسا پورو رکھ اٹ پاکستانی تے اُراتیا سرکینہ، داوخت اسکان 20ہزار پاکستانی تے پدی ایسونن، اسہ لکھ 20ہزار پاکستانی بننگ نا است خواہ ءُ۔ پدی بروک آ پاکستانی تا کچ اٹی ودکی مننگ ءِ۔ اوپارے کہ اینو آن 21مئی اسکان 22ملک آتیان 10ہزار 710پاکستانی تے پدی اتینہ، 90درسد پاکستانی پاکستانی خلیجی ملک آتے ٹی ءُ۔ اگہ پارت آتیا عمل کپنہ تو دانا نسخان اوفتا خاہوت و پاکستانی الس ءِ مریک، اگہ دین انا تالانی ودا تو اوڑآ نظرثانی کروئی تمک۔ اوپارے کہ ویب سائٹ www.covid.gov.pkآ ہرجہاز انا سرجم ساڑی ءِ، دا ویب سائٹ آن بیدس ہچ ءُ معلومداری سے آ باور کننگپ۔
