صدر مملکت ڈاکٹرعارف علوی نا پارلیمنٹ ہاؤس نا دورہ ءِ کننگ نا وخت آ پارت

قومی اسمبلی نا دیوان اٹی کورونادین انارداٹ راجی فاصلہ تون اوار ایلو رکھی گام گیج آتیا عملدرآمدءِ پک کننگے
اسلام آباد۔ 08 مئی (اے پی پی) صدر مملکت ڈاکٹر عارف علوی پارت کرینے کہ قومی اسمبلی نا دیوان اٹی کورونادین انا رداٹ جان جوڑی نا راہشون اصول آتیا عمل کرسا راجی فاصلہ تون اوار ایلو رکھی گام گیج آتیا عملدرآمد ءِ پک کننگے۔ داپارت آتے او جمعہ نادے آ پارلیمنٹ ہاؤس نا دروہ ءِ کننگ نا وخت آ تس۔ صدر مملکت قومی اسمبلی نا ہال انا دورہ ءِ کرے و قومی اسمبلی نا دوشنبے نادے آ بناکروک آ دیوان نا بست وبند آتا جاچ ءِ ہلک۔ دا وخت آ اودیوان نا بابت حوال تننگ نا کماشی ءِ کرے۔ ڈپٹی اسپیکر قومی اسمبلی قاسم خان سوری و قومی اسمبلی نا بڑزکو کمامدارآک صدر مملکت ءِ حوال تسر۔ صدر مملکت ءِ حوال اٹ پاننگاکہ کوروناوائرس نا بابت جوڑکمیٹی نا سلاہ و سوج آتیا قومی اسمبلی نا دیوان نا ایس پی پیز آتے پک کننگانے، دا ایس اوپی تا رداٹ قومی اسملبی نا دیوان اٹی پارلیمنٹ نا باسک آتا ساڑی گری نا کچ انا تعین پارلیمانی لیڈرآتا صوابدید آ مریک۔ قومی اسمبلی نا دیوان اسہ دے انا وقفہ اٹ مسہ گھنٹہ مریک۔ مہمان تا پارلیمنٹ ہاؤس وپارلیمنٹ لاجز اٹ بننگ آ پابندی مریک۔ پارلیمنٹ نا بیرہ المی عملہ دفتر آ بریک۔ وزیر آتون عملہ نا بیرہ اسہ بندغ اس بریک۔ صحافی تے خصوصی پاس جاری مریک۔ 50سال آن زیات وئی نا بندغ آتیان خواست کننگک کہ او اُراتیٹی مریر۔ صدرمملکت عارف علوی پارت کرے کہ قومی اسمبلی نا دیوان اٹی کورونادین انارداٹ جان جوڑی نا راہشون اصول آتیا عمل کرسا راجی فاصلہ غاتون اوار ایلو رکھی گام گیج آتیا عملدرآمد ءِ پک کننگے۔ باسک آتا نشست آتا نیام اٹ جوان ءُ فاصلہ اس برجاتخنگے۔ باسک آتے وار وار آ ایس اوپیز آن معلومدار کننگے۔ اوپارے کہ ہچ کس ءِ معلوم اف کہ دا دین ہراوخت اسکان چلینگک۔ ہنداخاطرآن آخبت اٹی ہم دیوان تا اڈتننگ اٹ دا حکمت علی آن فائدہ ہرفنگ مریک۔ اوپارے کہ صحافی تیکن ہم جوان ءُ گام گیج کننگے و اوفتا نشست آتا نیام اٹ ہم راجی فاصلہ ءِ پک کننگے۔ ہنداوڑ پارلیمنٹ نا مسیت اٹی نماز خواننگ نا وخت آ ضابطہ اخلاق آ عملدرآمد ءِ پک کننگے و راجہ فاصلہ ءِ برجاتخنگے۔