وزیراعظم ناسلاہکار موسمیاتی بدلی ملک امین اسلم نااٹک اٹی دیوان آن تران

حکومت چنکاپوریاگرآتا مشکل آتا احساس ءِ کرسا لاک ڈاؤن اٹ نرمی نا فیصلہ کرے
اسلام آباد۔ 08 مئی (اے پی پی) وزیراعظم نا سلاہکار موسمیاتی بدلی ملک امین اسلم پارینے کہ حکومت چنکا پوریاگر تپہ نا مشکل آتا احساس ءِکرسا لاک ڈاؤن اٹی نرمی نا فیصلہ ءِ کرینے، داسہ کورونانا دین اتون مون تننگ کن پوریاگر برادری ءِ ہم حکومت تون کمک کروئی مریک۔ داخیال آتا درشانی ءِ او ڈی سی آفس اٹک اٹی اہم دیوان نا کماشی ءِ کرسا کرے۔ دیوان اٹی ڈپٹی کمشنر اٹک تون اوار ضلعی انتظامیہ ، پورویاگر برادری و چیمبر آف کامرس نا نمائندہ غاک ساڑی ئسر۔ ڈپٹی کمشنر اٹک اٹی کوروناوائرس نا تازہ انگا حالیت و داڑتون مون تننگ کن چست کروک آ گام گیج آتیا سرجم حوال تس۔ اواٹک اٹی احساس ولشت پروگرام نا بابت حوال ترسا پارے کہ دا وخت آ مچ آ ضلع ٹی 21نا خڑک احساس ولشت سینٹر کاریم کننگ ءُ و داوخت اسکان 30ہزار حقدارخاہوت آتے ٹی 37کروڑ 13لکھ روپئی نا زر بشخنگانے۔ کوروناٹائیگر فورس انا بابت حوال ترساپارے کہ چندی تحصیل تیٹی ٹریننگ نا بناءِ کننگانے۔ داوخت آ گپ وتران کرسا ملک امین اسلم پارے کہ ٹائیگر فورس دا مشکل ساہت اٹی حکومت نا دوتے سبک کیک و ان شاءاللہ اٹک اٹی ہم بھاز زوت ٹائیگر فورس انا لانچنگ دود اس مریک۔ اوکان پد مینا بازار اٹک نا پوریاگر آک ملک امین اسلم ءِ لاک ڈاؤن نا بابت تینا گڑتی تیان معلومدار کریر۔ ملک امین اسلم پوریاگر برادری ءِ تسلی ترسا پارے کہ حکومت ءِ چنکا پوریاگر تپہ نا مشکل آتا احساس ارے، و ہنداسوب آن لاک ڈاؤن اٹی نرمی نا فیصلہ ءِ کننگانے ولے داڑتون اوار اوار دا دین اتون مون تننگ کن پوریاگر برادری ءِ ہم حکومت تون کمک کروئی مریک ۔ داوخت آ ملک امین اسلم ڈی سی اٹک ءِ پارت کرے کہ پوریاگر برادری تون میٹنگ اس کرسا اوفتا سلاہ تے ہم ایس اوپیز اٹ اوار کننگے۔