اسلام آباد۔ 08 مئی (اے پی پی) وزیراعظم نا سلاہکار واپار عبدالرزاق داؤد پارے کہ کمپنیز ایکٹ اٹ کروک آ ساڑی آ ترمیم تیان واپاری ادارہ غاتیا انتظامی بھاریم اٹ کمتی بریک وخت اس کہ ترمیم اٹی ورلڈ بینک انا کاروباری آسانی تا درجہ بندی نا اِرا اہم ٹک، واپار بناکننگ و کمپنی تا اقلیتی شیئر ہولڈرز آتا حق ات گچینی بریک۔ داڑے تینا بیان اٹی اوپارے کہ سیکورڈ ٹرانزیکشن ایکٹ 2016 ٹی ترمیم منقولہ میرات آتا الیکٹرانک رجسٹری ءِ فعال کننگ اٹ کمکار مریک۔ رجسٹری نا فعال مننگ آن خاص وڑاٹ چنکا کاروبار والا تیکن بینک آتیان وام ہلنگ آسان مریک۔ اوپارے کہ دا اہم ترمیم آن ورلڈ بینک انا کاروباری آسانی تا درجہ بندی نا رپورٹ اٹی پاکستان نا وام تا فراوانی نا بابت ٹک 20درجہ اسکان بڑزاکاہک۔ اوپارے کہ دا گام گیج آتیان ایس ایم ایز نا بشخ پین گچینی نا کسر آ کاہک۔ اوپارے کہ چنکا کاروباری یونٹ آتا زرگزرانی شونداری ٹی اہم ءُ کڑد اسے وخت اس کہ روزگار و برآمدآتے ٹی ہم دانا بشخ نمان ءِ اوپارے کہ حکومت ایس ایم ایز نا بشخ ءِ سوگو کننگ کن گچین گام گیج کننگ ءِ ہرانا مثبت بھرم مون آ بننگءِ۔
