اسلام آباد۔ 08 مئی (اے پی پی) وزیراعظم نا خصوصی کمکار راجی رکھ و تخفیف نیزگاری ڈاکٹر ثانیہ نشتر جمعہ نادے آ اسلام آباد امام بری ٹی احساس ایمرجنسی کیش ہند انا اناگت دورہ ءِ کرے۔ ڈاکٹر ثانیہ نشتر اسہ اسہ لس بندغ اسے آنبار مخلوق ءِ ایمرجنسی کیش انا ہلنگ اٹ پیش بروک آ ویل آتیان معلومداری دوئی کرے۔ اوہند آ کروک آتا بست وبند آتا جاچ ءِ ہلک۔ سینٹر اٹی ساڑی حقدار زالبول و نرینہ غاتون گپ وتران کرے۔ کوروناغان بچنگ نا رکھی گام گیج آتے ہراہرافتے ٹی سینٹرز ءِ ڈس انفیکٹ کننگ، راجی فاصلہ ءِ برجاتخنگ و دوتے سینیٹائزر کننگ اوار ءِ۔ داوخت آ ڈاکٹر ثانیہ نشتر پارے کہ صارف آتا آسراتی کن نادرا نا دفتر آتے 4 مئی آن یلہ کننگانے۔ احساس ایمرجنسی کیش صارف آتے کن 24گھنٹہ ٹی دوتا نشان تا بائیو میٹرک پک و مرک آتا اندراج نا ویل آتے ایسر کننگ نا بست وبند کننگانے۔ مرک آتا اندراج کن 50روپئی نا فیس ءِ ہم بشخنگانے۔ ہرابندغ آتے 8171آن دا ایس ایم ایس کلہو رسینگ تنے کہ اوفتا کوائف نا جانچپڑتال داسکان برجاءِ اوفتے ہندا ہفتہ ٹی اہلیت نا حتمی کلہو ءِ مون تننگک۔ ہرابندغ آتا شناختی کارڈ انا مد انا میعاد چٹانے او اہلیت نا رداٹ احساس ایمرجنسی نا کمکی زر ادائیگی ہند آ متکن آ شناختی کارڈ ءِ نشان ترسا ہلنگ کیرہ۔ صارف آتا آسراتی کن یکم ستمبر آن پد انا مدت المیعاد نا شڑت ءِ چٹفنگانے۔
