لاک ڈاؤن نا سوب آن لس بندغ نا زند مشکل اٹی ءِ و چنکا و درمیانہ درجہ نا کاروباری تپہ، دیہاڑی دار مزور، خواری کش ، دوکاندار ، رکشہ و ٹیکسی ڈیور آتون اوار شیفکو و درمیانہ تپہ ءِ بھاز مشکل آتا مون تروک ءِ
وزیراعظم عمران خان نا نیشنل کوآرڈینیشن کمیٹی نا دیوان آن پد گپ وتران
اسلام آباد۔ 07 مئی (اے پی پی) وزیراعظم عمران خان پگہ(ہفتہ ) غان لاک ڈاؤن ءِ مرحلہ وار چٹفنگ نا پڑو ءِ کرسا پارینے کہ دانا سوب آن لس بندغ نا زند مشکل اٹی ءِ و چنکا و درمیانہ درجہ نا کاروباری تپہ، دیہاڑی دار مزور، خواری کش، دوکاندار ، رکشہ و ٹیکسی ڈیور آتون اوار شیفکو و درمیانہ تپہ ءِ بھاز مشکل آتا مون تروک ءِ ، الس ایس او پیز نا سختی اٹ تینٹ پابندی ءِکیر۔ پولیس نا کمک اٹ چھاپہ خلسا دا ویل ءِ ایسر کننگ مفک۔ پبلک ٹرانسپورٹ ءِ ملنگ آ صوبہ غاتا گڑتیک ءُ، اوفتیان بیدس فیصلہ کننگ خواپنہ، صوبہ غاتون سلابت ءِ برجاتخنہ۔ داخیال آتا درشانی ءِ او پنچ شنبے نادے آ نیشنل کوآرڈینیشن کمیٹی نا دیوان آن پد گپ وتران کرسا کرے۔ وزیراعظم پارے کہ 26فروری آ کورونانا اولیکو کیس مون آبس، 13مارچ آ ہراتم ملک اٹی بیرہ 26کیس ئسر تو حکومت لاک ڈاؤن نا فیصلہ ءِ کرے و ہموتم آن اینو اسکان حکومت چندی وڑانا مچی و الس نا مچی تا جاگہ غاتے بند کرینے۔ اوپارے کہ دا وائرس ترندی اٹ تالان مریک و بھاز زوت اسٹ آن ایلو ٹی منتقل مریک۔ ہنداخاطرآن اونا تالانی ءِ توننگ نا کمک اٹ راجی فاصلہ ہی ءِ۔ ہندا خاطرآن مچ آ دنیا لاک ڈاؤن نا کسر ءِ اختیار کریر، نن ہم تینا ملک اٹی ہنداوڑ ہی کرین ولے ننا حالیت آک چین، امریکہ و شون ہلوک ملک آتیان جتاءِ۔ گڑتی ئس کہ لاک ڈاؤن آن دیہاڑی دار ، چھابڑی والا ، مزور کارو خواری کش تپہ ہرا 75آن 80درسد اسکان رجسٹرڈ ہم افس، بھاز زہمی مریرہ، حکومت ءِ فکر ئس کہ اوفتا انت مریک و او ہراوڑ تینا گزار ءِ کیرہ۔ وزیراعظم پارے کہ نن دنیا نا حالیت آتا جاچ ءِ ہلساکرینن،م امریکہ کون آ ملک اٹی اِرا اِراہزار بندغ ہڑدے کسکرہ۔ داکان بیدس دنیا نا ایلو شون ہلوک ملک آتے ٹی ہم مرک آتا کچ بھاز زیات ئس۔ برطانیہ، اسپین اٹلی ٹی بھاز زیات مرک مسکہ۔ پاکستان اٹی حالیت آتیا نظر تخنگ کن نن نیشنل کمانڈ اینڈ آپریشن سینٹر(این سی او سی) ءِ جوڑ کرین و اسد عمر ءِ اوناانچارج کرین۔ ہڑدے ہموڑے دیوان مریک و صوبہ غاتون ہم رابطہ مریک، ڈاکٹرز آک ہم سلابت کیرہ و مچ آ ڈیٹا ءِ دوئی کننگ آن پد تجزیہ کرسا فیصلہ کننگک۔ وزیراعظم پارے کہ خوش قسمتی اٹ ننا ملک اٹی یورپ آنبار دا وائرس ترند متو و ننا داڑے شکر ءِ کہ ہسپتال آک مخلوق آن داوڑ پُرمتوس ہراوڑ یورپ اٹی حالیت آک دوتیان پیش تمار۔ وزیراعظم پارے کہ حکومت لاک ڈاؤن ءِ ملنگ نا بابت پدریسہ سجفسا کرے، اول نن تعمیرات نا بشخ ءِ ملنگ نا فیصلہ کریسن و اینو نن دا فیصلہ ءِ کرینن کہ ہفتہ نا دے آن لاک ڈاؤن ءِ مرحلہ وار ملنگے انتئے کہ لاک ڈاؤن آن ملک اٹی چنکا دوکاندار، دیہاڑی دار، رکشہ و ٹیکسی ڈٛیور، خواری کش ، سفید پوش، درمیانہ و چنکا درجہ نا کاروباری تپہ ءِ بھاز مشکل آتا مون تروک ءِ و گڑتی ءِ کہ دُن مف کہ اوفتا کاروبار آخبتی وڑاٹ بند مف۔ وزیراعظم پارے کہ لاک ڈاؤن ءِ ملنگ آن حالیت آتا بگڑینگ انگ نا خدشہ ساڑی ءِ ولے الس ءِ زمواری و نظم و ضبط انا درشانی ءِ کروئی مریک۔ ہنداوڑ نن مرک آتے ٹی ودکی نا خدشہ غان بچنگ کینہ۔ وزیراعظم پارے کہ ساڑی حکومت پاکستان نا تاریخ نا غٹ آن بھلا ریلیف پیکج ءِ تسنے، ہراترندی اٹ نن دا کاریم ءِ کرین، دنیا نا پدتموک ملک آتے ٹی مننگ کتنے۔ کوروناوائرس آن ودی مروک آحالیت آتیان حکومت کن ہم مشکل آتے ٹی ودکی مس۔، خراج اٹی 35درسد کمتی بس، برآمد آک ہم کم مسر، وخت اس کہ حکومت تون پیسہ نا مہالو آن کمتی ءِ ، داحالیت آتے ٹی حکومت لاک ڈاؤن ءِ برجاسلنگ آن اخس پین پیسہ مخلوق ءِ تننگ کیک۔ وزیراعظم ڈاکٹر ثانیہ نشتر ءِ مبارکباد ترساپارے کہ اوکم وخت اٹی شفافیت و میرٹ نا کمک اٹ بھلوکچ اسے ٹی پیسہ بشخا۔ پین بے روزگار مروک آتے ہم پیسہ ایتنہ۔ وزیراعظم کوروناریلیف فنڈ آن بے روزگارآتا کمکءِ کننگک۔ دا فنڈ اٹی اسہ روپئی اس الس و چار روپئی حکومت تننگ ءِ۔ اوپارے کہ ساڑٛی حکومت تدوک آ اسہ تُو اٹی ڈیزل نا نہاد اٹی 43روپئی و پٹرول نا نہاد اٹی 30روپئی کمتی کرینے۔ برصغیر اٹی پاکستان اٹی غٹ آن زیات پٹرول و ڈیزل اڑزان ءِ۔
