کویت ناپاکستان تون زرگزرانی، دفاعی و عسکری بشخ آتے ٹی کمکاری نا مون آ دننگ کن سٹریٹجک پلان اس جوڑ کننگ نا سلاہ

اسلام آباد۔ 07 مئی (اے پی پی) کویت پاکستان تون زرگزرانی ، دفاعی و عسکری بشخ آتے ٹی کمکاری ءِ مون آ دننگ کن 5آن 20سال انا مد آ تالان سٹریٹجک پلان اس جوڑ کننگ نا سلاہ پیش کرے۔ دا سلاہ ءِ کویت نا وزیر خارجہ تینا پاکستانی ہم منصب شاہ محمود قریشی تون ٹیل فون آ رابطہ ٹی پیش کرے۔ ترجمان دفترخارجہ نارداٹ وزیر خارجہ شاہ محمود قریشی پنچ شنبے نادے آ تینا کویتی ہم منصب ڈاکٹر احمد نصیرال محمد الصباح تون ویڈیو لنک انا کمک اٹ رابطہ کرے۔ ہڑتوم آ وزیر خارجہ غاک کوروناجہانی دینی حالیت و داڑتون مون تننگ کن کروک آ کوشست آتون اوار تین پہ تینی است خواہی نا چندی باندات آتیا گپ وتران کریر۔ وزیر خارجہ داوائرس نا توننگ کن کویتی حکومت نا کنڈآن کروک آ وخت آ گام گیج آتا ستاءِ کرسا پاکستان اٹی دا دینی حالیت آتون مون تننگ کن برجاکوشست آتیان تینا کویتی ہم منصب ءِ معلومدار کرے وپارے کہ کوروناجہانی دینی چیلنج دا صدی ٹی بنی نوع انسان ءِ پیش بروک آ بھلا چیلنج آتیان اسٹ ءِ۔ شاہ محمودقریشی کورونا دینی تناظر اٹ پدتموک ملک آتا زرگزران تے سیبو تننگ کن وزیراعظم عمران خان نا ‘‘گلوبل ڈیٹ ریلیف’’ خواست انا سرجم آتیان کویتی وزیر خارجہ ءِ معلومدار کرے۔ کویتی وزیر خارجہ کورونا دین انا رداٹ پدتموک ملک آتا زرگزرانی بحالی کن وزیراعظم عمران خان نا گلوبل ڈیٹ ریلیف سلاہ نا ستا ءِ کرسا سلطنت کویت نا کنڈآن دا خواست انا مخ تفی نا باوری ءِ کرفے۔ ڈاکٹر احمد نصیرال محمد الصباح پارے کہ کویت پاکستان نا جان جوڑٛی نا بشخ انا گچینی کن ہم گمانی مالی کمک فراوان کننگ کن سنبرینگوک ءِ۔ کویتی وزیر خارجہ پارے کہ ننے فوڈ سیکورٹی و جان جوڑی نا بشخ آتے ٹی پاکستان نا کمک درکار ءِ۔ کویت نا وزیر خارجہ پاکستان و کویت نا نیام اٹ زرگزرانی ، دفاعی و عسکری بشخ آتے ٹی کمکاری ءِ مون آ دننگ کن 5آن 20سال انا مدآ تالان سٹریٹجک پلان اس جوڑ کننگ نا سلاہ ءِ ہم پیش کرے۔ شاہ محمود قریشی پارے کہ پدریسہ لاک ڈاؤن و بے سوب پابندی تا سوب مقبوضہ جموں و کشمیر اٹی کورونا دین انا تالانی نا گڑتی پن ودانے۔ اوپارے کہ بھارت سرکار تینا ہندوتوا سوچ انا رداٹ بھارتی مسلمان تے کوروناوائرس نا تالانی نا زموار گوندسا مذہبی منافرت ءِ تہو تننگ ءِ، جہانی برادری دمدستی وڑاٹ دا بھارتی رویہ نا نوٹس ءِ ہلے۔ کویتی وزیر خارجہ پیدوار کرے کہ ہندوستان اٹی جاری اسلاموفوبیا و مسلمان آتون ناروا سلوک نا توننگ کن کویتی کونسل آف منسٹرز او آئی سی آن گچین کڑد ادا کننگ نا خواست کرینے۔ وزیر خارجہ کویت نا وزیر خارجہ ءِ حالیت آتا مست آنبار مننگ آن پد دورہ پاکستان نا سلہ خلک ہرادے او منت واری اتون امنا کرے۔ ہڑتوم آ وزیر خارجہ غاتا نیام اٹ دا دینی چیلنج اتون مون تننگ و اہم ہڑتوم آ کنڈآتا باندات آتیا پیش رفت نا جاچ ءِ ہلنگ کن ہرتُو اِرا وار سلابتی رابطہ غا امنا کریر۔