تعمیراتی صںعت نا بابت مینو فیکچرنگ یونٹس و دوکان تے ملنگ نا فیصلہ کننگا، حماد اظہر

اسلام آباد۔ 07مئی (اے پی پی) بنجائی وزیر صنعت و پیداوار حماد اظہر پارینے کہ تعمیراتی صںعت نا بابت مینو فیکچرنگ یونٹس و دوکان تے ملنگ نافیصلہ ءِ کننگانے، حالیت آتا پدریسہ چاروکی ءِ پک کننگ انگ ءِ۔ ہفتہ ٹی اِرادے کاروبار بند مریک ولے دا اِرادے اٹی ہم دوائی و ضرورت نا گڑاتا دوکان تے ملنگ نا موکل مریک۔ پنچ شنبے نادے آ قومی رابطہ کمیٹی نا دیوان آن پد گپ وتران کرسا اوپارے کہ کورونا نا دین انا رداٹ لاک ڈاؤن آن پد 14اپریل آن تعمیراتی صںعت ءِ جزوی وڑاٹ ملنگ نافیصلہ ءِ کننگاسس، دارداٹ پین رعایت تننگ انگ ءِ ، اوپارے کہ داسہ تعمیراتی صنعت تون گنڈوک گڑاجوڑ کروک آ یونٹس و دوکان تے ملنگ نا فیصلہ ءِ کننگانے۔ اوپارے کہ بروک آ ہفتہ غان پی وی سی پائپس، اوفتا مینو فیکچرنگ یونٹس، سرامکس اینڈ سینٹری ویئرز، کیبلز، اسٹیل و ایلومینیئم یونٹس و اوفتا دوکان و ہارڈویئر نا دوکان تتون اوار تعمیراتی صںعت نا بابت ایلو بشخ آتا دوکان و مینو فیکچرنگ یونٹ آتے ملنگک۔ اوپارے کہ دافیصلہ نا دنگ مچ آ ملک اکن ءِ، خلقی علاقہ و کمیونیٹیز آتے ٹی گلی، کوچہ و محلہ غاتے ٹی واقع دوکان تے سہب آن ہلیس شام انا5بجہ اسکان ملنگ نا موکل مریک۔ ہفتہ ٹی اِرادے کاروبار بندمریک ولے داہڑتوم آ دے تیٹی ہم دوائی و ضرورت نا گڑاتا دوکان تے ملنگ نا موکل مریک۔ بنجائی وزیر پارے کہ زرگزران ءِ کرار کرار آ ملنگ انگ ءِ، حکومت حالیت آتا پدریسہ چاروکی ءِ کننگ ءِ و ضرورت تمنگ آ پین صںعت آتے پدریسہ ملنگک۔