کوویڈ۔ 19 نا جہانی دین انا سوب آن اپریل اٹی پاکستان نا برآمد آک 54درسد اسکان کم مسر، ادارہ شماریات

اسلام آباد۔ 07 مئی (اے پی پی) کوویڈ۔ 19نا جہانی دین انا سوب آن پاکستان نا برآمدآک اپریل 2020ء ٹی 54درسد اسکان کم مسر۔ ہنداوڑ درآمدآک ہم اپریل 2020ء ٹی 34.5درسد کم رہینگانو۔ ادارہ شماریات پاکستان (پی بی ایس) نا حساب وکتاب نا رداٹ جاری مالی سال انا بنائی دہ تُو جولائی آن اپریل 2019-20ء ٹی پاکستان نا واپاری نسخان اٹی 25.7درسد یعنی 6.73ارب ڈالرنا کمتی ریکارڈ کننگانے و داٹی واپاری نسخان نا کچ 19.5ارب ڈالر اسکان کم مسنے۔ پی بی ایس نا رداٹ اپریل 2019ء ٹی قومی برآمد اک 54.2درسد نا کمتی آن 957ملین ڈالر رہینگانے۔ ایلو کنڈ درآمد آک ہم 34.5درسد نا کمتی آن 3.1ارب ڈالر اسکان کم مسنو۔ اقتصادی جاچکار آک پارینو کہ جہانی دین انا رداٹ جہانی واپار سست روی نا گواچی ءِ انتئے کہ لاک ڈاؤن نا رکھی گام گیج آتا سوب کاروباری و واپاری سرجزآتا بند مننگ آن ملکی برآمد آتے ٹی کمتی مسنے ولے لاک ڈاؤن اٹ نرمی آن پد برآمد آتے ٹی ودکی نا گمان ءِ۔