حکومت آک کوویڈ۔ 19نا تنکی آ حالیت آتے ٹی فضائی ڈاک انا گچینی کن پین کمکاری کیر، ایاٹا

اسلام آباد۔ 07 مئی (اے پی پی) جہانی ایئر ٹرانسپورت ایسوسی ایشن (ایاٹا) و یونیورسل پوسٹل یونین ئسک خبڑدار کرینو کہ پوسٹل سروسز نا فراوان کننگ کن فضائی کاریم نا کچ بس اف ہنداخاطرآن حکومت آتے مرے کہ کوویڈ۔ 19نا تنکی حالیت آتے ٹی فضائی ڈاک انا گچینی کن پین کمکاری کیر۔ ایاٹا نا کنڈآن جاری پریس ریلیز نا رداٹ حالیت آتا سوب مسافر جہاز آتے ٹی 95درسد کمتی مسنے، ہراعمومی وڑاٹ ڈاک انا ترسیل ہم ہندا جہاز آتا کمک اٹ مننگ ءِ و صارف و کاروباری ادارہ غاتا کنڈآن راجی فاصلہ تخنگ نا پابندی تا رداٹ آن لائن ہلنگ نا سیبو ءِ ہلنگ نا بناءِ کرینے و ای کامرس نا طلب اٹی 25آن 30درسد ودکی مسنے ہراناسوب آن گڑاتا ترسیل کن ڈاک انا اہمیت ہم ودانے۔ مچ آ دنیا نا ڈاک منتظمین آتے ودوک آ طلب نا برعکس جہانی ڈاک و گڑا خاص وڑاٹ بین البراعظمی ڈاک انا ترسیل اتی چیلنج تون مون تروئی تمنگ ءِ ۔ ایاٹا و یونیورسٹل پوسٹل یونین حکومت آتیان خواست کرینے کہ او شڑت آتے ٹی نرمی و لچک ودی کیر تانکہ سیمی بندش آتا سوب آن ودوک آ واپاری مانگ ءِ پورو کننگ، واپار نا روانی ءِ برقرار تخنگ ءِ پک کننگ مرے، بے گرج قاعد و ضابطہ آن پاناد کننگے و چارٹرڈ جہاز آتے کن پرمٹ نا بناءِ کننگ نا عمل نا رفتار ءِ ترند کننگے۔ داکان بیدس ڈاک سرمننگ آ اونا کلیئرنس و پراسیس ناعمل ءِ پک کننگ کن جوان تربیت یافتہ عملہ نا خذمت آتے دوئی کننگے۔ ایاٹا و یوپی یوایئر لائن نا تروک آ معلومداری و گچین الم تا کمک اٹ کمرشل مسافر جہاز آتیان بیدس کارگو جہاز آتا معلومداری فراوانی ٹی ڈاک انا محکمہ غاتے کمک فراوان کننگءِ۔ یوپی یو نا ڈائریکٹر جنرل بشاراے حسین نا پاننگ ءِ کہ ڈاک انا ترسیل نا بنائی ذریعہ 4.5ملین آن زیات مسافر جہاز آتا منسوخی نا مطلب کاریم نا کچ اٹی کمتی، خڑچ و فراوانی نا وخت ءُ پاس اٹی ودکی ءِ۔ ڈاک انا ترسیل ءِ برقرار تخنگ کن فضائی مال برداری نا گنجائشت اٹی کمتی ءِ مر کننگ نا دمدستی گام گیج آتا گرج ءِ۔