بلین ٹری سونامی ڈٹ اٹی لاک ڈاؤن اٹی بے روزگار مروک آ مزور آتے روزگار نا وارخواہی فراوان کننگا، ملک امین اسلم

اسلام آباد۔ 06مئی (اے پی پی) وزیراعظم نا خصوصی کمکار ماحولیاتی بدلی ملک امین اسلم پارینے کہ وزیراعظم عمران خان نا بلین ٹری سونامی ڈٹ اٹی لاک ڈاؤن اٹی بے روزگار مروک آ66 ہزار آن زیات مزور آتے روزگار نا وارخواہی فراوان کننگا، غٹ بندغ آک لاک ڈاؤن نا سوب صںعت، پبلک ٹرانسپورٹ، ہوٹل، کانڑو تعمیراتی صںعت آتون اوار ایلو سیکٹر آتا تدوک آ 2تُو انا لاک ڈاؤن اٹی بند مننگ نا سوب آن بے روزگارمسوسر۔ داخیال آتا درشانی ءِ او چارشنبے نادے آ‘‘اے پی پی’’ تون خصوصی گپ وتران کرساکرے۔ اوپارے کہ کوروناوائرس نا سوب مچ آ ملک اٹی لاک ڈاؤن اٹی لکھ آ بندغ آک بے روزگار مسنو ہرافتا بحالی کن حکومت چندی ڈٹ آتا پڑو ءِ کرینے، ہنداوڑ اسہ ڈٹ اسے ٹی بلین ٹری پروجیکٹ نا رداٹ بے روزگار مزور آتے کن دیہاڑی نا بنداو آ روزگار فراوان کننگانے۔ اوپارے کہ کم و ود 66291مزور ہڑدے دا ڈٹ آ کاریم کیرہ و ملک انا چندی علاقہ غاتے ٹی شجر کاری مہم اٹ بشخ ہلسا ہڑدے 500روپئی آن زیات نا دیہاڑی خلیرہ۔ دا پیسہ غاتے اٹ او تینا و تینا اُراوالاتیکن دا مشکل وخت اٹی کُننگ نا بست وبند ءِ کیرہ ، دا غٹ بندغ آک لاک ڈاؤن نا سوب آن صںعت، پبلک ٹرانسپورٹ، ہوٹل، کانڑ وتعمیراتی صنعت آتون اوار ایلو سیکٹر آتا تدوک آ اِرا تُو انا لاک ڈاؤن اٹ بند مننگ نا سوب آن بے روزگار مسوسر۔ اوپارے کہ صوبہ خیبر پختونخوا ٹی بے روزگار 22ہزار، صوبہ پنجاب اٹی 17391، سندھ اٹی 11900، آزاد کشمیر اٹی 8500، بلوچستان اٹی 3500وخت اس کہ گلگت بلتستان اٹی 3000ہزار بندغ آتے دا ڈٹ انا رداٹ روزگار تننگانے۔ اوپارے کہ ورلڈ اکنامک فورم اسہ وار ولدا وزیراعظم عمران خان نا 10بلین ٹری ڈٹ ءِ خراج تحسین پیش کرسا اسہ ویڈیو اس جاری کرے ہراٹی کوروناوائرس نا سوب لاک ڈاؤن اٹی بے روزگار مروک آ مزور آتے کن بلین ٹری ڈٹ آن روزگار فراوان کننگ نا عمران خان نا گام گیج آتا ستاءِکننگانے کہ اسہ کنڈ دا ڈٹ آن ماحولیاتی کچٹی ءِ کم کننگ اٹ کمک رسینگک تو ایلو کنڈ دا ڈٹ ساڑی حالیت آتے ٹی سد آ مزور آتا اُراتا یخ مروک آ چولہا تے ولدا لگفینے۔