زرتلافی کن 30ارب روپئی جتا، رسک شیئرنگ بست وبند آتارداٹ بنجائی حکومت پرنسپل اماؤنٹ اٹ 40درسد نسخان نا بھاریم ءِ ہرفک، وزارت خزانہ

اسلام آباد۔ 06مئی (اے پی پی) وزارت خزانہ و اسٹیٹ بینک آف پاکستان چنکا و درمیانہ درجہ نا کاروبار(ایس ایم ایز) و چنکا کاروبار ءِ اسٹیٹ بینک انا ری فنانس آسراتی نا کمک اٹ وام تا فراوانی ٹی کمک فراوان کننگ نا رداٹ رسک شیئرنگ نا وڑوڈول ءِ درستی راستی کرفینے، حکومت دارداٹ چار سال تیان تالان وخت اٹی بینک آتے کن کریڈٹ رسک شیئرنگ فیسلٹی نا رداٹ زرتلافی کن 30ارب روپئی جتا کرینے۔ وزارت خزانہ نا کنڈآن سے شنبے نادے آ داڑے جاری بیان نا رداٹ ایس ایم ایز کن ری فنانس اسکیم نا مناسب اجتماعی و بینک خطرہ غاتا رداٹ وزارت خزانہ بینک آتون رسک شیئرنگ اٹ تینا کڑد ءِ ادا کیک۔ بنجائی حکومت چارسال آتیا تالان وخت اٹی بینک آتے کن کریڈٹ رسک شیئرنگ فیسیلیٹی نا رداٹ 30ارب روپئی جتا کرینے ہراآخبت اٹی ہروڑنا بیڈلونز آتیان مروک آ نسخان نا ازالہ ٹی کاریم اٹ اتنگرہ۔ رسک شیئرنگ بست و بند آتارداٹ بنجائی حکومت وام انا بنداوی بشخ (پرنسپل اماؤنٹ) اٹ 40درسد نسخان نا بھاریم ءِ ہرفک۔ دا آسراتی آن بینک آتے اسٹیٹ بینک انا ری فنانس اسکیم نا رداٹ 2ارب سالانہ ٹرن اوور والا ایس ایم ایز و سمال کارپوریٹ یونٹ آتے وام تا فراوانی نا ترغیب ملک۔ اسٹیٹ بینک کوروناوائرس نا دین و لاک ڈاؤن نا رداٹ ایس ایم ایز و چنکا کارپوریٹ یونٹ آتا ملازم آتا روزگار نا رکھ اکن ری فنانس اسکیم اس درستی راستی کرفینے۔ دا اسکیم نا رداٹ دا ادارہ غاتے تینا ملازم آتا مسہ تُو اسکان تنخواہ تا ادائیگی ءِ پک کننگ کن رعایتی وام انا آسراتی فراوان کننگانے۔ وزارت خزانہ نا ترجمان پارے کہ رسک شیئرنگ نا وڑوڈول ءِ وزارت خزانہ و اسٹیٹ بینک غٹ تعلقدار اسٹیک ہولڈرآتا سلاہ تے مون آ تخسا درستی راستی کرفینے و داڑآن بینک آتے ایس ایم ایز ءِ وام تا فراوانی ٹی ترغیب ملک۔ وزارت خزانہ نا کنڈآن دا رداٹ زرتلافی نا دمدستی منظوری آن کریڈٹ رسک شیئرنگ فیسلیٹی نا بناممکن مسنے و دارداٹ اسٹیٹ بینک سرکلر اس جاری کرینے۔ اسٹیٹ بینک دا اسکیم آ عملدرآمد نا چاروکی ءِ کیک۔