ملک اٹی کوروناوائرس نا پک کیس آتا جم اٹنگا کچ 22،550، مرک آتا کچ 526مس، نیشنل کمانڈ اینڈ آپریشن سینٹر

24گھنٹہ ٹی 1049پوسکن ءُ کیس، پین 40مرک رپورٹ
اسلام آباد۔ 06 مئی (اے پی پی) نیشنل کمانڈ اینڈ آُپریشن سینٹر کورونانا دین انا بابت تازہ انگا اپ ڈیٹ ءِ جاری کرے، ملک اٹی کوروناوائرس نا ایکٹیو کیس آتا کچ 15807 پک کیس آتا کچ ہم 22550اسکان سرمس۔ تدوک آ 24گھنٹہ ٹی 1049پوسکن ءُ کیس رپورٹ مس، 40پین مرک آتون جم مرک آتا کچ 526مس۔ این سی او سی نا رداٹ پنجاب اٹی کوروناوائرس کیس آتا کچ غٹ آن زیات 8420اسکان سرمس۔ سندھ اٹی 8189کوروناوائرس کیس رپورٹ مس، خیبر پختونخوا ٹی کیس آتا کچ 3499و اسلام آباد اٹی 485مس، بلوچستان اٹی 1495 گلگت بلتستان اٹی 386 کیس رپورٹ مس۔ آزاد کشمیر اٹی کوروناوائرس کیس آتا کچ 76مس۔ مچ آملک اٹی داوخت اسکان 6217ناجوڑ پورو وڑاٹ دراخہ جوڑ مسنو۔ این سی او پی نا رداٹ کوروناوائرس آن مرک انا باہ ٹی ہنوک آ بندغ آتا کچ 526اسکان سرمس۔ تدوک آ بیست ءُ چار گھنٹہ ٹی 40پوسکن ءُ مرک مس۔ جم وڑاٹ سندھ اٹی 148، پنجاب اٹی 156، کے پی کے ٹی 194، گلگت بلتستان اٹی 3، اسلام آباد اٹی 4و بلوچستان اٹی 21ناجوڑ کوروناوائرس نا سوب آن زوال کرینو۔ کرونا زہمی تیٹی ہندی تالانی 84درسد وخت اس کہ درملکی سفری تالانی 16درسد ءِ۔ داوخت اسکان 2لکھ 32ہزار 582بندغ آتا کوروناوائرس کن ٹیسٹ ءِ کننگا۔ تدوک آ بیست ءُ چار گھنٹہ ٹی 10178بندغ آتا ٹیسٹ ءِ کننگا۔ ملک انا 717ہسپتال آتے ٹی جوڑ آئسولیشن وارڈ آتے ٹی 4405ناجوڑ درمان مننگ ءُ۔ 203کورونا زہمی تا حالیت نازرک پاننگ انگ ءِ۔