بھارتی سفارتکار نا دفترخارجہ غابٹنگ ، چارمئی آ کنٹرول لین نا باغ سرسیکٹر اٹ جنگ بندی نا خارتس خلاف ورزی تیا برانز

اسلام آباد۔ 05 مئی (اے پی پی) بھارتی سینئر سفارتکار ءِ دفتر خارجہ غا بٹنگسا 4مئی آ کوزہ گر بھارتی فوج انا کنڈآن لین آف کنٹرول (ایل او سی ) نا باغ سرسیکٹر اٹی جنگ بندی ناخار تس خلاف ورزی تیا برانز ءِ ریکارڈ کرفنگا، بھارتی فوج انا خارتس سم کاری ٹی زالبول و چناتے تون اوار 6بندغ بھاز ٹھپی مسر۔ سے شنبے نادے آ ترجمان دفترخارجہ نا رداٹ برانزی مراسلہ ءِ بھارتی سینئر سفارتکار نا دوٹی ترسا پاننگاکہ کوزہ گر بھارتی فوج ایل او سی و ورکنگ باؤنڈری نا پدریسہ خلاف ورزی ءِ کرسا آرٹلری، بھلو و خودکار سلہہ غاتا کمک اٹ لس شاری آبادی تے شست کننگ ءِ۔ ڈائریکٹر جنرل پارے کہ شاری آبادی تے دانستہ وڑاٹ شست کننگ بے کچ است ہسونی ، انسانی عظمت و وقار ، جہانی انسانی حق و جہانی انسانی کانود آن چپ ءِ۔ بھارت نا کنڈآن جنگ بندی نا دا خلاف ورزی تیان علاقائی امن و سلامتی ءِ بھلو خطرہ اس مون تروک ءِ ہراٹی سٹریٹجک ردینک نا دروشم اٹ پیش تمنگ کیک۔ بھارت اینخو سال اٹی 957وار خارتس جنگ بندی نا خلاف ورزی کرینے ایل او سی آ بے چیٹی ٹی ودکی آن بھارت مقبوضہ کشمیر اٹی انسانی حق انا سنگین خلاف ورزی و ظلم آتیان جہانی چکار ءِ اسہ کنڈ کننگ کپک۔ ترجمان نا رداٹ بھارت آ زور شاغنگاکہ او 2003ء نا جنگ بندی معاہدہ نا پاسداری ءِ کے۔ جنگ بندی نا خلاف ورزی نا دا واقعہ غاتا جاست وپاست ءِ کرفے، بھارت فوج ءِ جنگ بندی نا شرف نا پرمان ایتے،م ایل او سی و ورکنگ باؤنڈری آ اونا رداٹ امن ءِ برجاتخے۔ اوزور شاغاکہ اقوام متحدہ ناسلامتی کونسل نا قرارداد آتا رداٹ بھارت اقوام متحدہ نا فوجی مبصر(یو این ایم او جی آئی پی) ءِ تینا کڑد ءِ ادا کننگ ناموکل ایتے۔