وزیراعظم نا خصوصی کمکار و ڈیجیٹل پاکستان ڈٹ انا سروک تانیہ آئدروس نا برطانوی نشریاتی ادارہ تون گپ وتران

کوروناوائرس تون جنگ تننگ اٹ ڈیجیٹل پاکستان نا اہم ءُ کڑد اسے
اسلام آباد۔ 05مئی (اے پی پی) وزیراعظم نا خصوصی کمکار و ڈیجیٹل پاکستان ڈٹ انا سروک تانیہ آئد روس پارینے کہ
پوسکن آ ٹیکنالوجی ان دوئی مروک آ ڈیٹا فیصلہ سازی ٹی اہم ءُ کڑد اس ادا کننگ کیک، اوداسلاہ نا درشانی ءِ کرے کہ شاید پاکستان اسہ پین بھلو لاک ڈاؤن اس سگپ ہنداخاطرآن ننے سمارٹ لاک ڈاؤن نا کنڈآ ہنوئی تمک۔ برطانوی نشریاتی ادارہ تون گپ وتران اٹی خصوصی کمکار پارے کہ کوروناوائرس تون جنگ تننگ اٹ ڈیجیٹل پاکستان نا اہم ءُ کڑد اسے۔ اوپارے کہ داوڑنا حالیت آتے ٹی پک و ریئل ٹائم ڈیٹا نا مفننگ اٹ دین ءِ کچ اٹ کننگ نا ردعمل موثر مننگ کپک۔ ملک اٹ دین انا مون ءِ توننگ نا حکمت عملی نا بنداو ءِ ڈیٹا غا تخنگانے و نن چندی صوبہ غاتا ڈیٹا یکجا کننگ کن گام گیج آتے حتمی دروشم اس تسونن، تانیہ پارے کہ بناٹی ہرکس تینا وڑاٹ کاریم کریکہ دا بابت اولیکو مشکل دا ئس کہ چندی نظام تا ڈیٹا ءِ ہمہ یکجا کننگے، داڑکن ہندن ءُ نظام اس ٹہیفنگے کہ صوبہ غاتا یکجا کروک آ معلومداری تے یکجا کننگ آن بیدس داٹی پوسکن ءُ خاصیت ہم اوار کننگانے ہراڑآن داسہ دا آسراتی ہم دوئی ءِ کہ الس واٹس ایپ آ ڈاکٹر آتون مشورہ ہم کننگ کیرہ۔ کوروناتون مون تننگ کن پوسکن آ ٹیکنالوجی نا کاریم اٹ اتنگ نا بابت اسہ سوج اسے نا ورندی ٹی تانیہ آئدروس پارے کہ ٹیکنالوجی ءِ بیرہ ٹیکنالوجی کن کاریم اٹ اتنگ اہم اف بلکن ڈیٹا نا کمک اٹ پالیسی نا تیاری زیات اہم ءِ۔ اوپارے کہ داوخت بنجائی دارالحکومت اسلام آباد تون اوار ملک انا غٹ صوبہ غاتے ٹی لاک ڈاؤن برجاءِ ہرانا سوب زرگزرانی سرجزآتے ٹی کمتی بسنے۔ مچ کروک آ ڈیٹا ٹی انت انتس ریکارڈ کننگ انگ ءِ، نا ورندی ٹی تانیہ آئدروس پارے کہ غٹ آن اہم مرکزی معلومداری ٹی ہراسٹ نا ٹیسٹ ءِ ہراوخت کننگ انگ ءِ، ناجوڑ نا فون نمبر انت ءِ ، شناختی کارڈ نمبر انت ءِ ، صنف و جان جوڑی نا ایلو ویل پین پین نا حساب وکتاب مرتب کننگ انگ ءِ۔