جہانی برادری ایل او سی آ بھارتی جارحیت و مقبوضہ کشمیر اٹی کودک کشمیری تیا است ہسون بیدادی تا توننگ کن دمدستی گام گیج چست کے، علی امین گنڈاپور

اسلام آباد۔ 05 مئی (اے پی پی) بنجائی وزیر امور کشمیر و گلگت بلتستان علی امین خان گنڈاپور جہانی برادری آن خواست کرینے کہ او ایل اوسی آ بھارتی جارحیت و مقبوضہ کشمیر اٹی کودک کشمیری تیا است ہسون بیدادی نا توننگ کن دمدستی گام گیج چست کے، بھارت ایل او سی آ جنگ بندی معاہدہ نا پدریسہ خلاف ورزی ءِ کننگ ءِ و ایل او سی آ سول آبادی ءِ شست کرسا جہانی کانود ءِ لتاڑنگ ءِ۔ سے شنبے نادے آ تینا بیان اٹی او پارے کہ بھارت دنیا نا خن تیٹی دھول بٹنگ کن نام نہاد لانچنگ پیڈزانا پروپیگنڈا ءِ کننگ ءِ۔ اوپارے کہ دنیا بھارت نا دروغ انا دعویٰ تیان جوانی اٹ بلد ءِ و تدوک آ سال فروری نا حالیت و واقعہ غاک جہانی دنیانامون آٹو، ہرا بے کنڈ ہلوک جہانی میڈٛیا و ادارہ غاک تینٹ ڈغاری راستکی تا جاچ ءِ ہلکر و بے بنداو بھارتی دعویٰ تا پول ءِ ملار اوپارے کہ پاکستان مدام بھارتی دعویٰ تا نفی ءِ کننگ کن جہانی مبصر آتے سلہ خلکونے تانکہ او تینٹ بھارتی بے بنداو دعویٰ تا جاچ ءِ ہلسا راستکی تیان دنیا ءِ معلومدار کیر۔بنجائی وزیر پارے کہ بھارت مقبوضہ کشمیر و کوروناوائرس نا آڑاٹ بھارت اٹ مسلمان تیا برجا بیدادی آن دنیا نا چکار ءِ اسہ کنڈ کننگ خواہک و ایل او سی آ پدریسہ جنگ بندی معاہدہ غاتا خلاف ورزی ءِکرسا سویلی ایشیا نا حالیت آتے بے چیٹ کننگ ءِ، اوپارے کہ بھارت داوڑنا قابل مذمت کارروائی تیان دنیاناچکار ءِ مقبوضہ کشمیراٹی انسانی حق انا است ہسونی حالیت و تینٹ بھارت اٹ مسلمان تا برخلاف تعصبانہ رویہ غان اسُل اسہ کنڈ کننگ کپک، اوپارے کہ بے کنڈہلوک جہانی ادارہ و جہانی میڈیا بھارت اٹ برجا ہندو انتہاپسند فاشٹ پالیسی تا پیدواری ءِ کننگ ءُ و بھارت نا ساڑٛی آ حکومت ءِ نازی جرمنی تون تشبیہ تننگ ءِ، اوپارے کہ اسہ کنڈ مچ آ دنیا کوروناوائرس نا ہلوک آ زہم تامقابلہ ءِ کننگ کن کوشست کننگ ءِ تو ایلو کنڈ ہندا اثناٹی بھارت تینا ہندوتا نا ایجنڈا ءِ مون آ دننگ کن مسلمان تا برخلاف برسرپیکار ءِ۔ اوپارے کہ بھارتی نام نہاد سیکولرزم دفن مسنے و بھارت نا درستی راستی داسہ اسہ ہندو انتہاپسند فاشٹ ملک اسے نا وڑ اٹ جوڑمسنے، ہراڑے اقلیت آتے کن ہچ ءُ جاگہ اس اف۔