کوئٹہ۔ 05مئی (اے پی پی) بلوچستان حکومت لاک ڈاؤن اٹی 19مئی اسکان ودکی کرے، صوبائی محکمہ داخلہ نا اعلامیہ نا رداٹ ہراٹی پاننگانے کہ حکومت کوروناوائرس نا تالانی نا رداٹ دفعہ 144نافذکرینے و اینو دوشنبے نادے آ 12 بجہ غا چٹوک آ لاک ڈاؤن اٹی پین 15دے انا ودکی کرس اودے 19مئی اسکان ودفینے۔ صوبہ ٹی لاک ڈاؤن اٹی راجی فاصلہ غاتا خیال ءِ تخسا زالبول و چناتیان بیدس موٹرسائیکل نا ڈبل سواری آ پابندی، بین الاضلاعی و بین الصوبائی پبلک ٹرانسپورٹ بند، دہ یا اوکان زیات بندغ آتا مچی آ پابندی و راجی و مذہبی مچی تیا ہم پابندی برقرارسلک۔ اعلامیہ نا رداٹ صوبہ نا تعلیمی ادارہ غاک ہم 31مئی اسکان بندمریرہ وخت اس کہ شاپنگ مالز، سینما گھر، شادی ہالز، ہوٹل ، شوروم ، درگاہ و دربار آتیا ہن و بر آہم پابندی مریک۔ لاک ڈاؤن اٹی تعمیراتی گڑاتروک آ دوکان و گودام ، کنوئی آ گڑاتا دوکان، کشت وکشار تون گنڈوک کاروبار، پٹرول پمپ ، کال سینٹرزآتے ملنگ نا موکل مریک۔ اوعلامیہ ٹی پاننگانے کہ ہرادوکان ، کاروبار ودفتر آتے ملنگ نا موکل تننگانے اوفتے کوروناوائرس آن بچفنگ نا رکھی گام گیج آتے تینا کننگ نا پارت کننگانے۔
