اسلام آباد۔ 04 مئی (اے پی پی) وزیراعظم عمران خان قومی و صوبائی اسمبلی نا باسک آتے پارت کرینے کہ او مشکل نا داساہت اٹی نئے بیرہ السءِ ریلیف تننگ نا کوشست آتے ٹی پبی کڑد اداکیر بلکن السءِ رکھی گام گیج اختیار کننگ نا ہم رغامر تانکہ ہراڑے ہر تپہ ءِ ریلیف نا فراوانی ءِ پک کننگ مرے ، ہموڑے کوروناوائرس نا تالانی ءِ گچین وڑاٹ توننگ مرے۔ وزیراعظم عمران خان پارے کہ ڈغاری راستکی خاص کر ملکی زرگزرانی حالیت و لس بندغ نا ویل آتے مون آ تخسا حکومت دا فیصلہ ءِ کرینے کہ بروک آ دے تیٹی لاک ڈاؤن اٹ پدریسہ نرمی کننگک ولے ہر بشخ اکن رکھی گام گیج آتیا مبنی جامع ایس او پیز تیار کننگانے ہرافتیا عملدرآمد کرفنگ کن السی نمائندہ غاک متحرک کڑد اداکیر ۔ وزیراعظم پارے کہ حکومت کوروناوائرس نا حالیت آتا رداٹ الس ءِ ہروڑریلیف تننگ کن کوشست کننگ ءِ۔ اوپارے کہ حکومت مشکل حالیت آتیان پد ہم جم وڑاٹ 1.25کھرب روپئی نا زرگزرانی پیکج نا پڑو ءِ کرے۔ اوپارے کہ ملک انا سوا اسہ کروڑ حقدار خاہوت آتے دُوانزدہ ہزار روپئی نا فراوانی ناعمل بے کچ شفافیت و میرٹ نا بنداو آ پک کننگ انگ ءِ۔ داکان بیدس مزور و ورکرز آتے ریلیف تننگ کن ہم اسہ خصوصی ءُ پروگرام اس بناکننگانے۔ اوپارت کرے کہ غٹ گچین مروک آ السی نمائندہ غاک داہیت ءِ پک کیر کہ اوفتا حلقہ ٹی غٹ حقدار آک حکومت نا کنڈآن تروک آ ریلیف پیکج آن باآسانی فائدہ ہرفنگ کیر۔ وزیراعظم باسک آتیان تران کرسا پارے کہ دا بے کچ است بڈءِ کہ کورونانا مشکل حالیت آتون مون تننگ و الس ءِ ریلیف فراوان کننگ نا کوشست آتے ٹی کمکاری کن ملک انا طور و عرض اٹ زند انا ہر بشخ آن تعلق تخوک آ بندغ آک بے کچ جوش وخروش اتون کوروناریلیف ٹائیگر فورس اٹ شمولیت اختیار کرینو۔ اوپارے کہ دہ لکھ رضاکار آتیا تالان کورونا ریلیف ٹائیگر فورس ءِ کاریم اٹ اتنگ کن ٹی او آرز تیار کننگانے اوپارے کہ خذمت نا جوزہ غان سرشار دا ٹائیگر فورس نئے بیرہ الس ءِ ریلیف نا فراوانی ٹی ضلعی انتظامیہ نا کمک ءِ کیک بلکن السی ہند آتیا رکھی گام گیج آتیا عملدرآمد اٹ کمکاری، یوٹیلیٹی اسٹورز تیا ضرورت نا گڑا تا اسٹاک نا حالیت آتا بارواٹی انتظامیہ ءِ معلومدار تخنگ کون آ اہم سرجز آتے سرانجام ایتک۔ وزیراعظم پارے کہ دا چرجوئی ٹی سیالکوٹ اٹ اسہ پائلٹ پروجیکٹ اس کننگانے ہرادے بنداو کرسا ٹائیگر فورس ءِ پبی کاریم اٹ اتنگ مریک۔ وزیر ڈٹ بندی اسد عمر کوروناوائرس نا حالیت و توننگ نا بابت دیوان ءِ حوال تس۔
