اسلام آباد۔ 4 مئی (اے پی پی)مزن وزیر عمران خان ءَ ایتھوپیا ءِ مزن وزیر ابے احمد علی ءَ گوں ٹیلی فون سرءَ گپ ءُ تران کتگ، اے موہءَ پاکستان ءِ مزن وزیر ءَ 2019 ءِ امنءُ ایمنی ءِ نوبل داد حاصل کنگءَ ایتھوپیا ءِ مزن وزیر ءَ رامراد بات داتگ۔ مزن وزیر میڈیا کارگس ءَ چہ جاری پریس ریلیزءِ ردءَ پاکستانءِ مزن وزیر ءَ انگیج افریقہ پالیسی ءِ ردءَ ایتھوپیا ءِ گوں نزیکیں دونیمگی سیادی ءِ ضلورت ءِ سرءَ زور پِر داتگ۔ عمران خان ءَ پاکستان ءِ نیمگ ءَ چہ ایتھوپیا ءِ اُلس ءُ حکومت ءَ گوں یکوئی ءِ درشانی کتگءُ کوویڈ 19 ءِ شنگءُ تالانی ءَ را گرءُ دار کنگءِ ھاترءَ آئیءِ اثرمندیں گامگیج ءَ را ساڑاتگ۔ آیاں گشتگ کہ دیمروئی ءِ راہ معیشت ءَ را دیمروئی دیئگءِ ھاترءَ گامگیج کنگ ءِ ضلورت اِںت۔ دوئیں راہشوں اقوام متحدہ ءِ سیکرٹری جنرل ءُ ایندگہ فریقین آں ہوار یکجاہ کار کنگءِ سرءَ تپاک کتگ تنکہ وامانی ادا بوہگءَ ریلیف ءِ جیڑہ ءِ سرءَ منصوبہ بندی جوڑ کنگ بہ بیت۔ مزن وزیر عمران خان ءَ اے موہءَ دوئیں ملک آنی نیامءَ سیاسی ءُ سفارتی سیادی ءَ را گیش کنگءِ ضلورت ءِ سرءَ زور پر داتگ۔ مزن وزیر عمران خان ءَ ایتھوپیا ءِ مزن وزیر ءَ را پاکستان ءِ ترءُ تاب کنگءِ دعوت داتگ۔
