ملک انا چندی بشخ آتے ٹی کوروناریلیف ٹائیگر فورس فعال مسنے، ہندی کہول آ چندی ادارہ غاتے کمک فراوان کیک، سندھ حکومت ٹائیگر فورس انا خذمت آتے ہلنگ آن انکار کرینے
اسلام آباد۔ 04 مئی (اے پی پی) وزیراعظم نا خصوصی کمکار امور نوجوانان عثمان ڈار پارینے کہ سندھ حکومت ٹائیگر فورس انا خذمت آتے ہلنگ آن انکار کرینے، سیالکوٹ اٹی ٹائیگر فورس انا کماشی ءِ کننگ کن خواجہ آصف ءِ ضلعی انتظامیہ چھٹی اس نوشتہ کرینے، دا غیر سیاسی و رضاکار فورس ءِ داڑآسیاست بایدے کننگپ، ملک انا چندی بشخ آتے ٹی کوروناریلیف ٹائیگر فورس فعال مسنے، ٹائیگر فورس ہندی کہول آ چندی ادارہ غاتے کمک فراوان کیک۔ داخیال آتا درشانی ءِ او دوشنبے نادے آ داڑے پریس کانفرنس اٹی کرے۔ اوپارے کہ وزیراعظم عمران خان نا ٹائیگر فورس آن تران آن پد مچ آ ملک اٹی کوروناٹائیگر فورس فعال مسنے۔ اوپارے کہ حیرت ءِ سندھ اٹی پیپلزپارٹی نا حکومت ءِ ولے ولدا ہم سندھ حکومت ٹائیگر فورس انا خذمت آتیان فائدہ ہرفنگ آن انکار کرینے۔ سندھ آن ٹائیگر فورس اٹ رجسٹرڈ ورناتا کچ اسہ لکھ 54ہزار ءِ۔ وزیراعظم عمران خان نا درخواست آ ورناک ٹائیگر فورس اٹ بشخ ہلکر، اوپارے کہ ٹائیگر فورس اٹی رجسٹرڈ ورناتا کچ 10لکھ ءِ۔ رجسٹرڈ ورناتے ٹی انجینئرز، استاد، وکلاء و سلہہ بند فوج انا ریٹائرڈ باسک آتون اوار غٹ بشخ آتیان تعلق تخوک آ بندغ آک اوار ءُ۔ اوپارے کہ ٹائیگر فورس انا رضارکار آتے الیکٹرانک چپ انا کمک اٹ خصوصی شناختی نمبر تننگک۔ ٹائیگر فورس صوبائی، ضلعی، تحصیل و یونین کونسل کہول اسکان کاریم کیک۔ ضلع ، تحصیل، و یونین کونسل نا کہول آ گچین مروک آ نمائندہ غاک ٹائیگر فورس کمیٹی اٹ اوار مریرہ، اپوزیشن دا معاملہ غا سیاست کننگ ءِ، دارضاکار فورس ءِ داڑتون ہچ ءُ اختیار اس اف۔ اپوزیشن ءِ دا فورس انا ٹی او آرز ءِ پہہ مننگ نا گرج ءِ، فورس ءِ انتظامیہ نا پورو سرپرستی و کمک دوئی مریک۔
