اسلام آباد۔ 04 مئی (اے پی پی) بنجائی حکومت اینخو مالی سال اٹی سرکاری بشخ انا شونداری پروگرام (پی ایس ڈی پی) نا رداٹ جتا کروک بجٹ نا 76.1درسد شونداری فنڈز جاری کرینے۔ پی ایس ڈی پی نا رداٹ داوخت اسکان مست آن جاری و چندی پوسکن آ شونداری ڈٹ آتے کن 533.33ارب روپئی نا فنڈجاری کننگانے ہرافتے ٹی 102.7ارب روپئی نا درملکی کمک ہم اوار ءِ۔ ہنداوڑ بنجائی حکومت ہندی وڑاٹ جتا کروک بجٹ نا 76.1درسد وخت اس کہ درملکی امداد نا لحاظ اٹ 80.12درسد نا فنڈز جاری کرینے۔ ڈٹ بندی، شونداری و خصوصی گام گیج آتا کنڈآن جاری کروک حساب وکتاب نار داٹ جاری مالی سال 2019-20ء کن حکومت 701ارب روپئی نا شونداری بجٹ جتاکریسس۔ رپورٹ نا رداٹ جاری مالی سال اٹی چندی وزارت، ڈویژن و تعلقدار محکمہ غاتا ڈٹ آتے کن 230.3ارب روپئی یعنی جتا کروک بجٹ نا 75.42درسد نا بریبر فنڈز جاری کننگانے ہرافتے ٹی 13.41ارب روپئی یعنی 46.4درسد نا بریبر درملکی کمک نا عنصر ہم اوار ءِ۔ یات سلے کہ وزارت و ڈویژن پین پین کن 305.36ارب روپئی نا فنڈز جتا کننگاسس۔
