احساس ایمرجنسی کیش پروگرام نا رداٹ اولیکو اِرا کیٹیگری تیٹی 57لکھ 50ہزار حقدار خاہوت آتے ٹی 69ارب روپئی بشخنگانے، وزیراعظم نا خصوصی کمکار راجی رکھ و تخفیف نیزگاری ڈاکٹر ثانیہ نشتر نا پریس کانفرنس

اسلام آباد۔ 23اپریل (اے پی پی) وزیراعظم نا خصوصی کمکار راجی رکھ و تخفیف نیزگاری ڈاکٹر ثانیہ نشتر پارینے کہ احساس ایمرجنسی کیش پروگرام نا رداٹ اولیکو اِرا کیٹیگری تیٹی 57لکھ 50ہزار حقدار خاہوت آتے ٹی 69ارب روپئی بشخنگانے۔ پریس کانفرنس آن تران کرسا ڈاکٹر ثانیہ نشتر پارے کہ اولیکو کیٹیگری نا رداٹ 80درسد ادائیگی تا کاریم پورو مسنے وخت اس کہ ایلو کیٹیگری نا رداٹ کاریم ترندی اٹ برجاءِ۔ اوپارے کہ 3کروڑ 50لکھ درخواست آتے مسترد کننگا وخت اس کہ 89000کمپیوٹرائزڈ شناختی کارڈ انا شناخت مننگ کتو۔ اوپارے کہ تھرڈ کیٹیگری کن بست وبند آتے حتمی دروشم اس تننگانے۔ اوپارے کہ پروگرام ءِ شفاف کننگ کن پبی گام گیج کننگانے۔ وزیراعظم پاکستان نا پارت آتے مون آ تخسا داعمل ءِ بے کچ شفاف کننگانے۔ اوپارے کہ ہرا ریٹیلر حقدار آتے 12000روپئی تننگ نا وخت آ کٹوتی کریر اوفتا برخلاف سخت کارروائی کننگا۔ اوپارے کہ احساس راشن پورٹل حقدار آتے راشن نا بشخنگ کن ڈونر تنظیم آتون گنڈنگ کن جوڑ کروک آ اسہ سوگو ءُ سسٹم اسے۔ دانا مسخت نجی بشخ و ڈونر تنظیم تا بے کچ ضرورت مند و پدتموک بندغ آتسکان رسینگ ءِ آسان کننگ ناءِ۔ حقدار وڈونر تنظیمک ہڑتوم آ پورٹل اٹی اندراج کن درکار معلومداری فراوان کیرہ۔ حقدار و ڈونرز درج ذیل ویب سائٹwww.rashan.pass.gov.pk نا کمک اٹ تینے رجسٹرڈ کرفنگ کیرہ، حقدار آتا معلومداری تے پک کننگک و احساس ڈٛیٹانا کاریم اٹ اتسا اہلیت نا تعین ءِ کننگک۔ داوخت آ پاکستان تحریک انصاف نا راہشون ڈاکٹر شہباز گل پارے کہ دا بے کچ بدبختی ءِ کہ سندھ حکومت احساس پروگرام آ سیاست کننگ ءِ۔ اوپارے کہ حکومت احساس پوسٹرزآ وزیراعظم و ڈاکٹر ثانیہ نشتر نا عکس آتے خلتنے و ڈاکٹر ثانیہ نشتر بے کچ محنت ولگن اٹ کاریم کرینے۔ اوپارے کہ سندھ حکومت کوروناوائرس نا کٹس آتیا ہم سیاست کرے و بنجائی حکومت ءِ اوفتے پدی تس کہ داکاریم کپسہ۔ ہموکٹ آتے این آئی ایچ ٹی کاریم کننگ ءُ و بالکل سہی نتیجہ تننگ ءُ، اوسندھ حکومت آ زور شاغا کہ او داوخت آ سیاست کپ۔