چیئرمین سینیٹ محمد صادق سنجرانی نا ترکی نا گرینڈ نیشنل اسملبی نا 100سال پورو مننگ آ اسپیکر و باسک آتے مبارکباد

اسلام آباد۔ 23اپریل (اے پی پی) چیئرمین سینیٹ محمد صادق سنجرانی ترکی نا گرینڈ نیشنل اسمبلی نا اسپیکر و باسک آتے اسمبلی نا 100سال پورو مننگ آ چھٹی اس نوشتہ کرسا مبارکبادی تس وپارے کہ ترکی نا گرینڈ نیشنل اسمبلی ہردور اٹی جمہوری عمل نا مون آدننگ اٹ اہم ءُ کڑد اس اداکرینے۔ چیئرمین سینیٹ پارے کہ جمہوریت نا بقا، امن و شونداری ٹی گرینڈنیشنل اسمبلی السی جوزہ غاتا عکاسی ءِ کرینے۔ کوروناوائرس نا سوب ودی مروک آ حالیت آتارداٹ دا چرجوئی ٹی سلاہ ئی دود آتے پدبٹنگ جوان ءُ گام گیج اسے۔ پنچ شنبے نادے آ سینیٹ آن جاری بیان نا رداٹ چیئرمین سینیٹ محمد صادق سنجرانی دا عزم انا درشانی ءِ کرے کہ پاکستان ترکی تون تعلقداری تے قدر انا نظر اٹ ہرک، پاک۔ترک تعلقداری بین الپارلیمانی تعلقداری و السی کہول آ رابطہ غاتے پین مون آ دینہ، امن، شونداری، اقتصادی، شونہالی ننا اسیجا ایجنڈاءِ۔ چیئرمین سینیٹ پارے کہ پاکستان ترکی ٹریول ایسوسی ایشن نا کنڈآن گرینڈ نیشنل اسمبلی نا صدسالہ دود آتا چرجوئی ٹی ورچول کنسرٹ گچین ءُ گام اسے۔ پاکستان نا الس ترک ایلم تا خوشی تیٹی شریک ءُ۔ اوپارے کہ ساڑی حالیت آتے ٹی پارلیمان آ بھلوزمواری اس بسنے، ننے پٹ وپول و شونداری نا چرجوئی ٹی کمکاری ءِ پین مون آ دروئی مریک۔