وزیراعظم احساس کیش پروگرام نا رداٹ خضدار نا حقدار آتے ٹی زرانا بشخنگ نا عمل برجاءِ

کوئٹہ۔ 23اپریل(اے پی پی) وزیراعظم احساس کیش پروگرام نا رداٹ خضدار نا حقدار آتے ٹی زرانا بشخنگ نا عمل برجاءِ ، قلات ڈویژن نا غٹ ضلع غاتے ٹی احساس پروگرام نا ارٹ میکو مرحلہ ٹی حقدار آتے بائیو میٹرک سسٹم نا کمک اٹ پک مننگ آن پد زر تننگ انگ ءِ۔ داہیت ءِ فوکل پرسن قلات ڈویژن احساس پروگرام آفتاب احمد صحافی تتون گپ وتران کرسا پارے او پارے کہ وزیراعظم احساس کیش پروگرام نا کمک اٹ ہر خاہوتءِ دُوانزدہ ہزار روپئی نا زر تننگ نا چرجوئی خضدار تون اوار قلات ڈویژن نا غٹ ضلع غاتے ٹی بائیو میٹرک سسٹم نا کمک اٹ حقدار آتے ٹی زر انا بشخنگ نا بناءِ کننگانے فوکل پرسن سرجم آتے پارسا پارے کہ خضدار تون اوار قلات ڈویژن نا غٹ ضلع غاتے ٹی وزیراعظم احساس کیش پروگرام نا کمک اٹ حقدار زالبول و نرینہ غاتے فی کس دُوانزدہ ہزار روپئی تننگ نا عمل ترندی اٹ برجاءِ۔ دا چرجوئی ٹی ضلع خضدار اٹی زالبول آتے کن چار ہند و نرینہ غاتے کن اسہ ہند اس جوڑ کننگانے۔ ہراڑے حقدار آک بائیو میٹرک سسٹم آن پک مننگ آن پد زردوئی کننگ ءُ۔ اونا پاننگ ئس کہ کمشنر قلات ڈویژن حافظ محمد طاہر نا جند قلات ڈویژن اٹی احساس پروگرام نا چاروکی ءِ کننگ ءِ، حقدار آتے ٹی حکومت نا کنڈآن تروک آ پیسہ غاک گچین وڑاٹ بشخنگ انگ ءُ۔