ملک و صوبہ غاتے ٹی کروناوائرس آن چندی پڑتیا جنگ برجاءِ، گورنر بلوچستان امان اللہ خان یاسین زئی

کوئٹہ۔ 23اپریل (اے پی پی) گورنر بلوچستان امان اللہ خان یاسین زئی پارینے کہ ملک و صوبہ غاتے ٹی کروناوائرس آن چندی پڑتیا جنگ برجاءِ، مشکل نا داساہت اٹی حکومت تون اوار اوار سخی و فلاحی ادارہ غاک پیش پیش ءُ۔ دارداٹ صوبہ نا نیزگار و نادار مخلوق کن کنوئی آ گڑاتیا تالان کمکی گڑاتے اوفتا درگہ اسکان سرکننگ ننا شاندار قومی قدر و روایت آتا گچین درشانی ءِ۔ داہیت ءِ او پنچ شنبے نادے آ گورنر ہاؤس کوئٹہ ٹی عمرخان اچکزئی تون اوڑدہی ٹی پارے۔ گورنر یاسین زئی پارے کہ خذمت خلق نا جوزہ نا رداٹ فراوان کروک آ کمک نا بابت نن عمر خان اچکزئی و ملک آن پیشن رہینگوک آ ایلم اونا حاجی نظر اچکزئی نا خصوصی وڑاٹ منت واری ءِ ہرفنہ ہرافک ساڑی لاک ڈاؤن نا حالیت آتے ٹی بیست ءُ پنچ ہزار خاہوت اٹی راشن بشخار، اوپارے کہ مشکل نا داساہت اٹی خواری کش تپہ غان تعلق تخوک آ نیزگار و نادار بندغ آک اِراوخت انا اِرغ نا دوئی کننگ آن قاصر ءُ تو داوڑنا حالیت آتے ٹی صوبہ نا غٹ سخی تا تینا صوبہ نا ایلم و ایڑھ تا کمک ءِ قدر انا نظراٹ ہرنہ۔ اوڑدہی ٹی عمر خان اچکزئی گورنر بلوچستان ءِ پارے کہ نن راشن ضلع قلعہ عبداللہ، پشین و کوئٹہ نا چندی علاقہ غاتے ٹی بشخان و تینا فلاحی ادارہ نا کنڈآن بھاز زوت پنچ ہزار پین خاہوت آتے کمکی گڑا سرکننگ نا بست وبند ءِ ہم کینہ۔