اسلام آباد۔ 23اپریل (اے پی پی) نیشنل کمانڈ اینڈ آپریشن سینٹر(این سی او سی) کوروناوائرس نا بابت تازہ انگا اپ ڈیٹ ءِ جاری کرے، ملک اٹی کورونا نا پک کیس آتے ٹی تدوک آ 24گھنٹہ ٹی 742کیس ودکی اتون کچ 7952وخت اس کہ کوروناوائرس نا دین آن زہمی بندغ آتا جم کچ 10513اسکان سرمس، تدوک آ 24گھنٹہ ٹی 15پین کورونا زہمی جان آن دوتے سلار، جم زوال کروک آتا کچ 224مس۔ نیشنل کمانڈ اینڈ آپریشن سینٹر(این سی او س) نا رداٹ پنچ شنبے نا سہب انا 8بجہ ءُ 30منٹ اسکان تدوک آ 24گھنٹہ ٹی 742پوسکن ءُ کیس پورٹ مس۔ ہنداوڑ پنجاب اٹی 4590، سندھ اٹی 3373، خیبر پختونخوا ٹی 1453، اسلام آباد اٹی 204، بلوچستان اٹی 552، گلگت بلتستان اٹی 290و آزاد کشمیر اٹی 51بندغ آتا کوروناوائرس آن زہمی مننگ پک مسنے، داوخت اسکان کوروناوائرس آن 224زوال کرینو ہرافتے ٹی تدوک آ 24گھنٹہ نا 15زوال کروک آک اوار ءُ، زوال کروک آتیان 69سندھ، 58پنجاب، 83کے پی کے، 3اسلام آباد، 8بلوچستان و 3گلگت بلستان آن ءُ۔ این سی او سی نا رداٹ داوخت اسکان 60کورونا زہمی تا حالیت نازرک ءِ ، دا ناجوڑک وینٹی لیٹرآٹو۔ داوخت اسکان اسہ لکھ 24ہزار 549بندغ آتا ٹسٹ مسنے ہرافتے ٹی تدوک آ 24گھنٹہ غاتا 6700ٹیسٹ اوار ءُ۔ داوخت اسکان مون آ بروک آ کیس آتے ٹی 79درسد ہندی وخت اس کہ 21درسد پیشن نا ملک آتیان بروک آ مخلوق آن کورونا وائرس منتقل مسنے۔ 717ہسپتال آتے کوویڈ19نا توننگ نا بابت آسراتی فراوان کننگاوخت اس کہ 2779کروناوائرس ناجوڑ ہسپتال آتے ٹی درمان مننگ ءُ۔
