ملک اٹی مئی انا ایسر وجون انا بنااسکان کوروناوائرس نا دین انا ترند مننگ نا گڑتی ءِ، مئی اسکان ٹیسٹنگ نا کچ ءِ 20آن 30ہزار ہڑدے ئی اسکان سرمریک، وزیر خارجہ شاہ محمود قریشی

اسلام آباد۔ 23اپریل (اے پی پی) وزیر خارجہ شاہ محمود قریشی پارینے کہ پاکستان مئی نا ایسر وجون انا بنااسکان کوروناوائرس نا دین انا ترندمننگ ناگڑتی ءِ، ننے بایدے تیار مرین، مخلوق ءِ رکھی گام گیج کننگ نا ترغیب تننگ اُن، مسخت خوف و بھیم تالان کننگ نا اف۔ پنچ شنبے نادے آ پاکستان اٹی دینی حالیت آتا بابت اسہ بیان اسے ٹی وزیر خارجہ پارے کہ خلجی ملک آتے ٹی پاکستانیک بھاز بھلو کچ اسے ٹی ءُ، ننے اوفتا مشکل آتا سماءِ، نن خوانہ کہ زوت جوان وڑاٹ اوفتے پدی اتنگے۔ تیل مارکیٹ اٹی مندی نا سوب آن اوفتا بے روزگار مننگ نا گڑتی ءِ۔ مچ آ دنیا نا زرگزران ءِ کورونا نا سوب آن بھاز نسخان رسینگانے۔ ننے آ ہم دا دین انا سوب آن زرگزرانی زور ودک۔ اوپارے کہ پاکستان اٹی مئی نا ایسر و جون انا بنااسکان کورونادین انا بڑزکو کہول آ سرمننگ نا گڑتی ءِ۔ ننے بایدے تیار مرین، کورونا زہمی تا کچ اٹی ودکی مریک۔ مرک آتا کچ اٹی ودکی ہم خارج ازامکان اف۔ وزیر خارجہ پارے کہ ٹیسٹنگ ودنگ ءِ تو کیس آک ہم ودرہ۔ مہالو ننا ٹیسٹنگ نا کچ مسہ ہزارئس ولے مئی اسکان ہڑدے ئی 20آن 30ہزار ٹیسٹنگ اسکان سرمریک۔ اوپارے کہ بالی پٹ آ سکریننگ کننگ انگ ءِ ننا ٹیسٹنگ نا کاریم نا کچ ہم ودنگ ءِ۔ بالی پٹ آتیا قرنطینہ نا آسراتی ٹی ہم ودکی مسنے، مہالو نن محدود استعداد نا سوب آن ہفتہ ٹی اِراہزار پاکستانی تے وطن آ پدی ایسونہ ولے داسہ ایلو بالی پٹ آتا ملنگ آن، ہرہفتہ 6آن 7ہزار اسکان شاری تے وطن آ پدی اتنگ کینہ۔ اوپارے کہ مخلوق ءِ رکھی گام گیج اختیار کننگ نا ترغیب تروئی مریک مسخت خوف و بھیم تالان کننگ اف۔ روچہ مبارک نا بنامننگ والا ءِ۔ مخلوق آن خواست کننگ اُن کہ بے جا بازار یا رش انگا جاگہ غاتیا ہِننگ آن پاناد کیر۔ نماز، ترابیح و جمعہ نا نماز ءِ خواننگ کن عالم دین و مشائخ عظام آتون سلابت آن پد اسہ لائحہ عمل اس طے کرینن تانکہ عبادت ہم مرسا کے و دین آن ہم بچنگ مرے۔ وزیر خارجہ پارے کہ کنا سلاہ دادے کہ ہر علاقہ ٹی اسہ مسیت کمیٹی اس جوڑ کننگے ہرا انتظامیہ تون کمک ہم کے و مسیت آتے ٹی ایس او پی و ضابطہ نا پیروی ءِ پک کے تانکہ دین انا تالانی ءِ توننگ مرے۔ داسہ مچ آ دنیا ٹی ویکسین نا بابت آزموندہ مننگ ءِ و اگہ سرسہبی دوئی مریک تو ولدا ویکسین نا تیاری ٹی ہم وخت لگک۔ کنے خوشی ءِ کہ پاکستانی میڈیا، کوروناوائرس نا دین آن بچنگ کن آگاہی تالان کننگ اٹ بے کچ مثبت کڑد ادا کننگ ءِ۔