اسلام آباد۔ 23اپریل (اے پی پی) صدر مملکت ڈاکٹر عارف علوی پارینے کہ کوروناوائرس نا ساڑی آ حالیت آتارداٹ چناتے ٹیلی اسکول نا کمک اٹ فاصلاتی تعلیم نا فراوانی اہم ءُ گام اسے، مشکل وخت اٹی دا تعلیم نا فراوانی نا گچین و آسان ءُ وڑوڈول اسے، ٹیلی اسکول نا کمک اٹ تعلیم نا فراوانی ٹی استاد آتا عزم ، حوصلہ و کارکڑدسفت نا قابل ءِ۔ داخیال آتا درشانی ءِ او پنچ شنبے نادے آ اسلام آبادکالج فار گرلز ایف سکس اٹی ٹیلی اسکول پروجیکٹ نا دورہ ءِ کننگ نا وخت آ گپ وتران کرساکرے۔ صدر مملکت پارے کہ انسان نا زنداٹی لوز آتا گچین کننگ اہمیت تخک۔ چناک استاد آتا ہیت کننگ آن ہیل کیرہ۔ استاد آک تعلیم نا فراوانی ٹی جوان لوز آتا گچینی ءِ کیر۔ اوپارے کہ ساڑی حالیت آتا رداٹ مواصلاتی تعلیم نصاب آن مون آ پیش تمانے ولے داہیت انا جاچ ءِ ہلنگ ہم المی ءِ کہ چناک ٹیلی اسکول آن ہراحداسکان ہیل کننگ ءُ۔ صدر مملکت پارے کہ ٹیلی اسکول نا کمک اٹ مواصلاتی تعلیم نا فراوانی کن وزارت تعلیم و کسبی تربیت علامہ اقبال اوپن یونیورسٹی نا عملہ و استاد آک شاندار کارکڑدنا درشانی ءِ کرینو۔ دا استاد آک عزم و ہمت نا ہمو مثال ءُ ہرانا ہچ ءُ بدل اس ف۔ خواری و عزم آن دا سرسہبی دوئی مننگ ءِ۔ اوپارے کہ ٹیلی اسکول تعلیم نا بشخ اٹی گچین ودکی ءِ۔ علامہ اقبال اوپن یونیورسٹی مست آن فاصلاتی وڑوڈول اٹ تعلیم فراوان کننگ ءِ ولے ساڑی حالیت آتے ٹی ٹیلی اسکول نا کمک اٹ چناتے تعلیم نا فراوانی آن پوسکن آ دور بناکرینے۔ داوڑوڈول انا رداٹ چناتیکن غٹ کلاؤڈز آک ساڑی ءُ۔ اوتینا لیکچرز آتے ریکارڈ ہم کننگ کیرہ وخت اس کہ لمہ و باوہ ہم ٹیلی اسکول نا کمک اٹ تیناچناتے خوانفنگ اٹ کمک کننگ کیرہ۔ اوپارے کہ کیلفورنیا ٹی اسہ سروے اسے ٹی معلوم مس کہ چناک اسکول آتا جاگہ غا فاصلاتی تعلیم آن زیات جوان ہیل کننگ کیرہ۔ صدر مملکت پارے کہ کنااست خواہی ئس کہ دُن ءُ نظام اس پاکستان اٹی ہم جوڑ مرے۔ دا تعلیم فراوان کننگ نا گچین و آسان ءُ وڑوڈول اسے۔ داوخت آ بنجائی وزیر تعلیم و کسبی تربیت شفقت محمود و پارلیمانی سیکرٹری وجیہہ اکرم ئسک ہم تران کریر۔ صدر مملکت ءِ دورہ ٹی ٹیلی اسکول نا وڑوڈول ، نصابی موادو ایلو باندات آتیا سرجم حوال تننگا۔
