لاک ڈاؤن نا سوب آن ہرامحنت مزوری کروک آ بندغ آک زہمی مسنو اوفتے کن وزیراعلیٰ بلوچستان جام کمال خان ہلہلہ ئی بنداو تیا گام گیج کننگ ءِ، صوبائی سلاہکار و چیئرپرسن کیوڈی اے گودی بشریٰ رند

کوئٹہ۔ 22اپریل (اے پی پی) صوبائی سلاہکار و چیئرپرسن کیوڈی اے گودی بشریٰ رند انا پارت آ حکومت بلوچستان و ڈپٹی کمشنر کوئٹہ میجر (ر) اورنگزیب بادینی نا کمک اٹ نن نا تہاری ٹی نیزگار و حقدار خلقت نا اُراتیا راشن سرکننگ نا عمل برجاءِ، ہراٹی داوخت اسکان 500آن زیات خاہوت آتسکان راشن سرکننگانے، ہرافتے ٹی سریاب روڈ، بروری روڈ، ڈبل روڈ، ہدہ، نواں کلی، کلی اسماعیل، پشتون آباد، جتک اسٹاپ، خروٹ آباد، اے ون سٹی، پرنس روڈ، بلوچی اسٹریٹ، کاسی روڈ، عثمان روڈ و ایلو علاقہ غاتے ٹی راشن سرکننگ نا عمل برجاءِ، صوبائی سلاہکار و چیئرپرسن کیوڈی اے گودی بشریٰ رند پارے کہ ہرامخلوق نن تون رابطہ کریسس نن اوفتا کمک ءِ کننگ اُن و ہمو سفید پوش خلقت ءِ راشن سرکننگ اُن اوپارے کہ اللہ تعالیٰ ننے دا خیر اکاکاریم اٹ برکت ایتے و ہر نیزگار نا کمک ءِ کننگ اٹ آسانی ودی کے، صوبائی سلاہکار گودی بشریٰ رند پارے کہ لاک ڈاؤن نا سوب آن ہرامحنت مزوری کروک آ بندغ آک زہمی مسنو اوفتے کن وزیراعلیٰ بلوچستان جام کمال خان ہلہلہ ئی بنداو تیا گام گیج کننگ ءِ تانکہ اوفتا اُراتا چولہاک کسپس، اوپارے کہ ننا حکومت راشن بشخنگ اٹ ڈیوالائی تے سگپک انتئے کہ دا حقدار آتا امانت ءُ ہرافتے انشاء اللہ اوفتسکان سرکرسا ساہ ہلینہ، راشن بشخنگ نا چرجوئی روچہ مبارک اسکان برجاسلک۔ اومستی پارے کہ لاک ڈاؤن نا سوب حقدار بندغ آتا کمک ءِ کننگ کن حکومت بلوچستان سنبرینگوک ءِ۔ شاری تیان ہم خواست ءِ کہ حکومت نا کنڈآن پاروک رکھی گام گیج، ماسک ،و راجی فاصلہ نا پرمان تیا عمل کرسا کوروناوائرس نا توننگ اٹ تینا کڑد ءِ اداکیر۔