اسلام آباد ۔ 22 اپریل (اے پی پی) وزیر ءِ درئی کار مخدوم شاہ محمود قریشی ءَ چیئرمین این ڈی ایم اے لیفٹیننٹ جنرل محمد افضل ءَ گوں گند ءُ نند کت ءُ ملک ءَ کورونا وائرس ءِ ھوپ ءِ جاور ھال ءُ جان سلامتی ساز ءُ سامان آنی دستیابی ءِ ھوالگ ءَ ھیال ریچی کت۔ چیئرمین این ڈی ایم اے ءَ وزیر ءِ درئی کار ءَ را سرجمیں دگنیا ءُ ھاسیں رنگ ءَ چین ءَ چہ آیوکیں جان سلامتی ساز ءُ سامان آنی بابت ءَ بریفنگ دات۔ اے موہ ءِ سر ءَ وزیر ءِ درئی کار ءَ گوشت کہ این ڈی ایم اے ءَ کورونا وائرس ءِ شنگ ءُ تالانی ءِ گر ءُ دار ءِ واستہ گامگیج چست کتگ۔ این ڈی ایم اے ءِ کرد ءَ را سرجمیں ملک ءَ شرپ مندیں نگاہ آں گوں چارگ بوھگ ءَ انت۔ شاہ محمود قریشی ءَ گوشت کہ وزارت ءِ درئی کار این ڈی ایم اے ءَ را ھمک رنگیں کمک ءُ آسراتی پجاری کنگ بوھگ ءَ انت۔ چین ءَ چہ سمان آنی بھا زوری ءُ پاکستان ءَ شنگ ءُ تالان ءَ وزارت ءِ درئی کار ءِ کرد ارزشتی انت۔ چیئرمین این ڈی ایم اے ءَ گوشت کہ چین ءَ پاکستانی سفارتخانہ ءَ ھمک رنگیں کمک ءُ زانت ءُ سرپدی پجاری کتگ، اے مشکلیں وھد ءَ آسراتی پجاری کنگ ءِ پد ئَ وزارت ءِ درئی کار ءِ شگر ءُ منت وار آں۔
