جہانی برادری مقبوضہ کشمیر اٹی بھارتی بیدادی نا نوٹس ءِ ہلے، صدر مملکت ڈاکٹرعارف علوی نا مظفر آباد اٹی میڈیا تون گپ وتران

اسلام آباد۔ 21اپریل (اے پی پی) صدر مملکت ڈاکٹر عارف علوی پارینے کہ کنٹرول لائن آ جنگ بندی نا خلاف ورزی ، بھارت اٹی مسلمان آتون تصبانہ سلوک و مقبوضہ کشمیر اٹی کشمیری تیا بھارتی بیدادی نا مذمت ءِ کرسا پارے کہ جہانی برادری خاص وڑاٹ اقوام متحدہ ءِ کورونادین انا رداٹ داحالیت آتا نوٹس ءِ ہلے، کشمیری تے تنیا الیپنہ، اوفتا مقدمہ ءِ ہرفورم آ چست کینہ، کورونا وائرس نا مون ءِ توننگ کن رکھی گام گیج آتیا عملدرآمد المی ءِ، یکجا مرسا دا دین انا مونءِ تورنہ۔ داخیال آتا درشانی ءِ او سے شنبے نادے آ مظفرآباد نا دورہ ءِ کننگ نا وخت آ میڈیا تون گپ وتران کرساکرے۔ داوخت آ صدر آزاد کشمیر سردار مسعود خان و وزیراعظم آزاد کشمیر راجہ فاروق حیدر ئسک ہم ساڑی ئسر۔ صدر مملکت پارے کہ آزاد کشمیر نا حکومت نا سلہ غاداڑے بسونٹ۔ اوپارے کہ آزاد کشمیر حکومت کوروناوائرس نا تالانیءِ توننگ کن گچین گام گیج کرے ہرانا سوب داڑے دا دین آن زہمی بندغ آتا کچ بھاز کم ءِ ، و اسہ بندغ اس ہم زوال کتنے۔ آزاد کشمیر نا الس ہم حکومت نا گام گیج آتا پبی عمل کرینے۔ اوپارے کہ بنجائی حکومت لاک ڈاؤن اٹی ضرورت نا گڑاتا بابت بشخ آتے ملنگ نا موکل تسنے۔ تعمیراتی سیکٹر ءِ ملنگانے۔ صدر مملکت پارے کہ چندی ملک آتے ٹی لاک ڈاؤن نا بابت ردعمل جتا ءِ۔ ہنداوڑ ننا ملک انا صوبہ غاک ہم حالیت آتا رداٹ لاک ڈاؤن نا بابت فیصلہ کریر۔ اورکھی گام گیج آتیا عملدرآمد آ زور شاغسا پارے کہ کوروناوائرس آن رکھ مننگ کن دوتے سلر، مون ءِ دوخلپس و ماسک بینر۔ کوروناوائرس آن بچنگ کن رکھی گام گیج آتیا عملدرآمد المی ءِ۔ اوپارے کہ روچہ مبارک مسلمان تیکن توبہ ، استغفار و بخشش نا تُوءِ، ننے کوروناوائرس نا ساڑی آ حالیت آتا رداٹ زیات آن زیات توبہ استغفار کروئی مریک۔ اوپارے کہ روچہ مبارک اٹی مسیت آتے ٹی عبادت کن عالم دین آتون 20 ٹک آتیا امنا کننگانے۔ دا 20ٹک آتیا عملدرآمد ءِ پک کرینن تانکہ ایلو بشخ آتیانبار مسیت آتے ٹی ہم راجی فاصلہ ءِ برجاتخنگ مرے۔ اوپارے کہ اسلام اٹی نظم ونسق آ زور شاغنگانے، قائد اعظم محمد علی جناح تینا پاروک آتے ٹی ایمان، سیوت و نتظیم آ زور شاغانے۔ نن ایمان، سیوت و تنظیم آ عمل کرسا سرسہبی دوئی کننگ کینہ۔ اوپارے کہ بھارت کنٹرول لین آ بھلو سلہہ سے تون سم کاری کننگ ءِ ہرانا مذمت ءِ کیوہ۔ بھارت اٹ کوروناوائرس نا رداٹ مسلمان آتون تعصب کننگ انگ ءِ و بھارتی مسلمان تیا بیدادی کننگ انگ ءِ۔ مقبوضہ کشمیر اٹی کشمیری تیا ظلم و ستم کننگ انگ ءِ۔ 1948ء آن ہلیس داوخت اسکان اسہ لکھ آن زیات کشمیری شہید مسر۔ اقوام متحدہ نا سلامتی کونسل دانا نوٹس ءِ ہلے۔ اقوام متحدہ نا سیکرٹری جنرل مچ آ دنیا ٹی ظلم و بیدادی ءِ توننگ نا خواست کرینے۔ نن کشمیری تتون سلوک اُن و اوفتیا مروک آ بیدادی ءِ دنیا نا ہرفورم آ تالان کینہ۔ اوپارے کہ کوروناوائرس نا دین انا اواری اٹ مقابلہ ءِ برجاتخوئی ءِ۔