اسلام آباد۔ 21اپریل (اے پی پی) وزیر خارجہ شاہ محمود قریشی تون وزیراعظم نا خصوصی کمکار قومی سلامتی معید یوسف سے شنبے نادے آ وزارت خارجہ ٹی اوڑدہی کرے۔ ہیت وگپ اٹی کوروناوائرس نا جہانی حالیت، پیشن نا ملک آتے ٹی رہینگوک وطن آ پدی بننگ نا چاری پاکستانی تا زوت پدی اتنگ نا بابت سرجم گپ وتران کننگا۔ وزیر خارجہ پارے کہ سے شنبے آن پیشن نا ملک آتے ٹی رہینگوک پاکستانی تا پدی اتنگ نا مسٹ میکو مرحلہ نا بناءِ کننگانے، دامرحلہ ٹی ہفتہ وار 5ہزار پاکستانی تے وطن آ پدی اتینہ۔ اوپارے کہ صوبہ غاتا کمک اتون کاریم نا کچ ودک و زیات آن زیات پاکستانی تے پیشن نا ملک آتیان وطن آ پدی اتنگ اٹ کمک رسینگک۔ شاہ محمود قریشی پارے کہ کورونادین انا تالانیءِ گچین وڑاٹ توننگ کن مچ آ ملک انا بالی پٹ آتیا ٹیسٹنگ و قرنطینہ نا آسراتی تے خاطر خواہ ودفنگانے۔ اوپارے کہ نن اسہ کنڈ کورونادین انا ہندی تالانی ءِ توننگ کن کوششت کننگ اُن تو ایلو کنڈ دا دینی حالیت آتا زرگزرانی مضمرآتون مون تننگ کن پبی کوشست کننگ اُن۔ خصوصی کمکار قومی سلامتی معید یوسف پیشن نا ملک آتے ٹی رہینگوک آ پاکستانی تا زوت وطن آ پدی اتنگ کن وزیر خارجہ نا خصوصی کوشست آتا ستاءِ کرے۔
