24گھنٹہ ٹی 16 زوال، 796پوسکن ءُ کیس رپورٹ مس، نیشنل کمانڈ اینڈ آپریشن سینٹر

اسلام آباد۔ 21اپریل (اے پی پی) نیشنل کمانڈ اینڈ آپریشن سینٹر نا رداٹ مچ آ ملک اٹی تدوک آ 24گھنٹہ ٹی کورونا دین آن 16زوال، 796پوسکن ءُ کیس رپورٹ مس اوکان پد کوروناوائرس نا پک کیس آتا کچ 9216و زوال کروک آتا کچ 192مس وخت اس کہ 2066ناجوڑ پورو وڑاٹ دراخہ جوڑ مسنو۔ نیشنل کمانڈ اینڈ آپریشن سینٹر نا کنڈآن سے شنبے نادے آ جاری کروک حساب وکتاب نا رداٹ مچ آ ملک اٹی کورونا نا پک کیس آتا کچ 9216اسکان سرمسنے وخت اس کہ ایکٹیو کیس آتا کچ ہم 6958اسکان ءِ۔ نیشنل کمانڈ اینڈ آپریشن سینٹر نا حساب وکتاب نا رداٹ تدوک آ 24گھنٹہ ٹی 796پوسکن ءُ کیس رپورٹ مس۔ پنجاب اٹی کوروناوائرس کیس آتا کچ غٹ آن زیات 4195اسکان سرمس، سندھ اٹی 2764کوروناوائرس کیس رپورٹ مس۔ خیبر پختونخوا ٹی کیس آتا کچ 1276و اسلام آباد اٹی 185مس، بلوچستان اٹی 465گلگت بلتستان اٹی 281کیس رپورٹ مس۔ آزاد کشمیر اٹی کوروناوائرس نا کیس آتا کچ 50مس۔ جم وڑاٹ 34درسد کیس ایلو ملک آتیان بس و 66درسد ہندی وڑاٹ تالان مسر۔ مچ آ ملک اٹی داوخت اسکان 2066ناجوڑ پورووڑاٹ دراخہ جوڑ مسنو۔ کوروناوائرس آن مرک انا باٹی ہنوک آ بندغ آتا کچ 192اسکان سرمس۔ تدوک آ بیست ءُ چار گھنٹہ ٹی 16مرک مسنے۔ سندھ اٹی 61، پنجاب اٹی 45، کے پی کے ٹی 74 ناجوڑ زند آن دوتے سلانو۔ گلگت بلتستان اٹی 3و بلوچستان اٹی 6ناجوڑ کورونا وائرس نا سوب آن زوال کرینو۔ بنجائی دارالحکومت اٹی ہم کوروناوائرس نا 3ناجوڑ دم تسر۔ حساب وکتاب نا رداٹ داوخت اسکان 111886بندغ آتا کورونا وائرس نا ٹیسٹءِ کننگا۔ تدوک آ گھنٹہ غاتے ٹی 5347بندغ آتا ٹیسٹ ءِ کننگا۔ ملک انا 597ہسپتال آتے ٹی جوڑ آئسولیشن وارڈ آتے ٹی 2443ناجوڑ درمان مننگ ءُ، ملک اٹی کوروناوائرس نا 52ناجوڑ نارزک حالیت اٹی ءُ۔