بنجائی حکومت نا کنڈآن احساس کیش پروگرام نا رداٹ صوبہ سندھ اٹی 15،73،159حقدار آتے 18،87،80،28000ہزار روپئی نا امداد سرکننگانے، وزیراعلیٰ سندھ سیاسی پوائنٹ سکورنگ کننگ ءِ، وزیر مملکت موسمیاتی بدلی زرتاج گل

اسلام آباد۔ 21اپریل(اے پی پی) وزیر مملکت موسمیاتی بدلی زرتاج گل پارینے کہ بنجائی حکومت نا کنڈآن احساس کیش پروگرام نا اولیکو مرحلہ ٹی سندھ اٹی 15لکھ، 73ہزار 159حقدار آتے ٹی 18ارب87کروڑ،80لکھ 28ہزار روپئی نا امداد بشخنگانے۔ وزیراعلیٰ سندھ سیاسی پوائنٹ سکورنگ کننگ ءِ۔ سے شنبے نادے آ تینا ٹویٹ اٹی زرتاج گل پارے کہ پیپلزپارٹی نا نمائندہ غاک امنا کیرہ کہ سندھ اٹی حقدار آتا پیدواری و اوفتسکان راشن سرکننگ کن اوفتے تون ہچ ءُ وڑوڈول اس اف۔ داہراوڑنا طرز حکومت ءِ ہرا نابودی و غلط بیانی تیٹی ڈبنگوک ءِ۔ اوپارے کہ سرکار نا پیسہ، السی خزانہ غان انت کہ حقدار آتا امداد ءِ کننگے اوفتا پکاوڑاٹ حساب ءِ تننگ ہرحکومت کن لازم ءِ۔ سرکاری خزانہ ذاتی مال اس اف ہرادے حقدار بندغ آتسکان سرکننگ نا پرچار کننگے۔ اوپارے کہ سندھ انا حکومت سرکاری امداد نابارواٹی متضاد بیان تننگ ءِ ہرا است ہسونی اسے۔ زرتاج گل پارے کہ پاکستنا تحریک انصاف نا بنجائی حکومت نا کنڈآن احساس کیش پروگرام نا رداٹ صوبہ سندھ اٹی 15لکھ، 73ہزار 159، حقدار آتے کل 18ارب 87کروڑ80لکھ28ہزار روپئی نا امداد سرکننگانے و ہربندغ نا ریکارڈ ارے۔ اوپارے کہ سندھ انا وزیراعلیٰ دوتو تفے ولے وڑوڈول غلط بیانی و سیاسی پوائنٹ سکورنگ ہی مسنے۔