بلوچستان نا سڑک آتا نیٹ ورک اخس سوگو مریک، زرگزران نا پہیہ ہموخس ترندی اٹ چلینگک، پدتموک آ علاقہ غاتے ٹی شونداری ڈٹ آتا پوروی آن شونہالی نا پوسکن آ دور بناکیک، صادق سنجرانی

اسلام آباد۔ 21اپریل(اے پی پی) چیئرمین سینیٹ محمد صادق سنجرانی پارینےکہ زند انا آب ءِ گچین کننگ کن گچین مواصلاتی نظام بے کچ اہم ءِ، بلوچستان اٹی سڑک آتا نیٹ ورک اخس کہ سوگو مریک زرگزران نا پہیہ ہموخس ترندی اٹ چلینگک، پدتموک علاقہ غاتے ٹی شونداری ڈٹ آتا پوروی آن شونہالی نا پوسکن آ دور بناکیک، کم شون ہلوک علاقہ غاتے شونداری نا بنجائی دنگ اٹ اتنگ کن سڑک آتا نیٹ ورک المی ءِ۔ سے شنبے نادے آ سینیٹ سیکرٹریٹ نا کنڈآن جاری بیان نا رداٹ داخیال آتا درشانی ءِ او این ایچ اے کمامدارآتا کنڈآن تروک آ حوال اٹی کرے۔ داوخت آ بلوچستان اٹی برجا ڈٹ آتیا پیش رفت نا جاچ ءِ ہلنگا۔ چیئرمین این ایچ اے چیئرمین سینیٹ ءِ تینا حوال اٹی پارے کہ دالبندین۔زیارت۔بالانوش روڈ انا فزیبلٹی ءِ پورو کننگانے۔ 71کلومیٹر روڈ آ ہفت ارب روپئی نا خڑچ بریک۔، داسہ ٹینڈر جاری کننگک۔ نوکنڈی۔ماشکیل روڈ انا فزیبلٹی آخیریکو مرحلہ غاتے ٹی ءِ۔ این ایچ اے حوال اٹی پارے کہ پلاننگ کمیشن آن زوت فزیبلیٹی نا منظوری ءِ ہلنگک۔ چیئرمین این ایچ اے باوری کرفے کہ چاغی۔دالبندین نا ٹینڈرنگ مرحلہ ءِ زور پورو کننگک۔ داوخت آ چیئرمین سینیٹ پارے کہ ڈٹ بے کچ اہم ءِ ہراڑآن علاقہ نا شونداری مریک۔ اوپارت کرے کہ ٹینڈر نا مرحلہ ءِ زوت پورو کننگے۔ اوپارت کرے کہ کوئٹہ ۔ نوشکی پورشن و کیشنگی موڑ ءِ زوت پورو کننگ تون اوار اوار نوکنڈی۔تفتان سیکشن پی ایس ڈی پی ٹی اوار کننگے۔ محمد صادق سنجرانی پارے کہ زند انا آب اٹ بدلی اتنگ کن گچین مواصلاتی نظام بے کچ اہم ءِ۔ بلوچستان اٹی برجا ڈٹ آتے زوت پورو کننگے۔ اوپارے کہ سڑک آتا نیٹ ورک اخس سوگو مریک زرگزران نا پہیہ ہموخس ترندی اٹ چلینگک۔ پدتموک آ علاقہ غاتے ٹی شونداری ڈٹ آتا پوروی آن شونہالی نا پوسکن آ دور بناکیک۔ کم شون ہلوک علاقہ غاتے شونداری نا بنجائی دنگ اٹ اتنگ کن روڈ انا نیٹ ورک المی ءِ۔