احساس کفالت پروگرام نا رداٹ بلوچستان تون اوار مچ آ ملک اٹی نیزگار و نادار بندغ آتا مالی کمکاری نا چرجوئی بناءِ و یک و نیم سد ارب روپئی مرحلہ وار غٹ اہل غریب خاہوت آتے فراوان کننگک، ڈپٹی اسپیکر قومی اسمبلی قاسم خان سوری

کوئٹہ۔ 21اپریل (اے پی پی) ڈپٹی اسپیکر قومی اسمبلی قاسم خان سوری پارینے کہ احساس کفالت پروگرام نا رداٹ بلوچستان تون اوار مچ آ ملک اٹی نیزگار و نادار بندغ آتا مالی کمکاری نا چرجوئی بناءِ و یک و نیم سد ارب روپئی مرحلہ وار غٹ اہل غریب خاہوت آتے فراوان کننگک بلوچستان اٹی دا پروگرام آ عملدرآمد کن چانڑدہ احساس کفالت سینٹر جوڑ ءِ ہرافتا کارکڑدگی نا پدریسہ جاچ ءِ ہلنگ انگءِ۔ داخیال آتا درشانیءِ او نجی موبائل کمپنی جاز انا کنڈآن 500خاہوت آتے کن تروک آ راشن بیگ آتے ایدھی سوشل سروسز نا حوالہ کننگ نا دود آن تران کرساکرے ۔ ڈپٹی اسپیکر قومی اسمبلی پارے کہ پاکستان اٹی مالی مشکل آتیان پد ہم حکومت وخت دوئی وسیلہ غاتے نیزگار الس نا آسراتی کن وقف کرسا فی خاہوت ءِ دُوانزدہ ہزار روپئی فراوانی نا تاریخی ریلیف پیکج اس تسنے و دا مالی کمکاری ءِ ہر غریب بندغ ءِ بیدس باسک اسمبلی یا وزیراسے نا سفارش آن بے پرخ تننگ انگ ءِ، وزیراعظم عمران خان نا کوشست ءِ کہ مشکل نا داساہت اٹی نیزگار خاہوت اسے نا چولہا کسپ، قاسم خان سوری پارے کہ پاکستان اٹی صاحب حیثیت و سخی تا اسہ بھلو کچ اس زکواۃ ایترہ دُن انگا سخی تیان خواست ءِ کہ او دا مشکل وخت اٹی مون آ بریر و نیزگار بندغ آتا کمک ءِ کننگ کن حکومت نا دوءِ سبک کیر، اوپارے کہ بنجائی حکومت تون اوار اوار صوبائی حکومت و گچین مروک آ اسمبلی نا باسک آک ہم حسب طاقت تینا تینا حلقہ غاتے ٹی نیزگار و مزور پیشہ تپہ غاتا کمک ءِ کننگ کن کاریم کننگ ءُ اللہ کورونانا برخلاف دا جنگ اٹ جیت ننا مریک و نن غٹ اواری اٹ دا ہلوک آ مرض ءِ شکست تننگ اٹ سرسہب مرینہ۔