مزن وزیر عمران خان ءُ صدر ءِ مملکت ڈاکٹر عارف علوی ءِ نیام ءَ گند ءُ نند، ملکی ءُ میاں اوستمانی کار آنی رد ءَ ھیال ریچی

اسلام آباد ۔ 20 اپریل (اے پی پی) مزن وزیر عمران خان ءُ صدر ءِ مملکت ڈاکٹر عارف علوی ءِ نیام ءَ دو شمبے ءَ ادا ایوان ءِ صرر ءَ گند ءُ نند ءِ بوت۔ گند ءُ نند ءَ ملکی ءُ میاں اوستمانی کار آنی سر ءَ ھیال ریچی کنگ بوت۔ اے موہ ءِ سر ءَ ملک ءَ کورونا وائرس ءِ ھوپ ءَ چہ پیداک بوتگیں جاور ھال آنی سر ءَ ھیال ریچی کنگ بوت۔ صدر ءِ مملکت ءَ حکومت ءِ نیمگ ءَ ملک ءَ کورونا وائرس ءِ ھوپ ءِ شنگ ءُ تالانی ءِ گر ءُ داسر ءِ واستہ گامگیج آناں ساڑات۔ آئی ءَ گوشت کہ م زن وزیر عمران خان ءِ نیمگ ءَ دیمروئی کنوکیں ملک آنی وام ءِ دیگ ءَ نرمی ءِ ھوالگ ءَ گامگیج آنی ھم توسیپ کت۔ صدر ءِ مملکت ءَ گوشت کہ حکومت ءَ الس ءُ ھاسیں رنگ ءَ چاگرد ءِ ھمزوریں تبک ءَ را احساس پروگرام ، یوٹیلٹی سٹورز، پناہ گاہ، لنگر خانہ ءُ ایندگر ارزشتی گامگیج آنی وسیلگ ءَ استیں جیڈھ آنی تہ زوتیں رد ءَ ریلیگ پجاری کنگ لوٹ ایت۔ ایشی ءَ ابید آئی ایس آئی ءِ ڈائریکٹر جنرل لیفٹیننٹ جنرل فیض حمید ھم گند ءُ نند ءَ ھوار بوت۔ اے موہ ءِ سر ءَ بھارت ءِ نیمگ ءَ لائن آف کنٹرول ءِ سر ءَ تیر گواری ءِ بندش ءَ را ھلاپ کنگ ءُ کورونا وائرس ءِ ھوپ ءَ چہ بنی آدمی ھک آنی لگت مالی کنگ ءُ مقبوضہ کشمیر ءَ شہری آزاتی آناں گیش ڈگار جنگ ءِ واستہ ایشرا بھانہ ءِ رنگ ءَ کارمرد کنگ ءَ را سک باز ایر جنگ بوت۔ گند ءُ نند ءَ اے گپ ءَ را سہرا کنگ بوت کہ بھارتی مقبوضۃ کشمیر ءَ الس آناں جان سلامتی رد ءَ بنیاتی جان سلامتی لوٹ آناں ھم دیگ نہ بوھگ ءَ انت۔ اے موہ ءِ سر ءَ مزن وزیر عمران خان ءَ صد ر ءِ مملکت ءِ شگر ءُ منت گپت ءُ رمضان المبارک ءِ برکتی ایں ماہ ءِ ساھت ءَ مسیت آنی توک ءَ تراویح ءِ ھوالگ ءَ عالم آنی نیام ءَ تپاکی ءِ واستہ آوانی کوشست آنی توسیپ کت۔ گند ءُ نند ءَ عالم آنی گوما منوگر بوتگیں مچی آنی کار رھبند ءُ ایشانی پد ءُ رند آنی ھوالگ ءَ ھیال ریچی کنگ بوت۔