اسلام آباد ۔ 19اپریل (اے پی پی) مزن وزیر ءِ ھاسیں کمکار برائے اھوالکاری ءُ شنگ کاری ڈاکٹر فردوس عاشق اعوان ءَ گوشت کہ صدر ءِ مملکت ءِ عالم آنی گوما شور ءُ مشورہ ءَ چہ پد یکجائی جار ءِ شنگ ءُ تالانی جوانیں کلوہ ات، رمضان المبارک ءِ ماھ ءَ کورونا وائرس ءِ شنگ ءُ تالانی ءَ را گر ءُ دار ءِ واستہ صدر ءِ مملکت ءِ جوانیں کرد لائک ءِ ستا انت، اے ھوپ ءَ چہ رکھینگی کار اے ھوپ ءِ مستریں علاج انت۔ یک شمبے ءِ روچ ءَ وتی ٹویٹ ءَ ھاسیں کمکار براے شنگ کاری ڈاکٹر فردوس عاشق اعوان ءَ گوشت کہ کورونا ءِ ھلاپ ءَ جنگ ءُ راجی کوشست آناں دیمروئی دیگ ءَ عالم آنی جوانیں کرد ات۔ مسیت آنی منبر ءُ محراب ءَ چہ آیوکیں گوانک ءَ را الس ھاسیں رنگ ءَ شرپ دینت ءُ دلگوشی ءَ گوں گوشدار انت۔ علام آنی شرعی حکم ءِ مھکم داری ءُ فرض آنی پیلو کنگ الس ءِ رکھینگ ءِ واستہ رھشونی ءَ بکن انت۔ وائرس ءَ چہ رکھینگ ءِ واستہ کار رھبند ءُ کار رپک سک باز المی انت۔ آئی ءَ گوشت کہ رمضان المبارک ءِ شرپ مندیں ماھ ءَ گس آنی توک ءَ عبادت بکن ات، ماہ ءِ روچگی ءَ رحمت ھمک گس ءِ توک ءَ ریچ انت۔
