اسلام آباد۔ 18اپریل (اے پی پی) سینیٹ نا قائمہ کمیٹی حوالکاری و شینکاری نا چیئرمین سینیٹر فیصل جاوید پارینے کہ غٹ صوبہ غاک وتواجہ ءُ، تینا تینا کاریم ءِ کننگ ءُ ولے سندھ کاریم کپننگ ءِ، سندھ انا نیزگار آتے کن ہم پیکج بیرہ بنجاتسنے۔ وزیراعظم نیزگار آتے کن ملکی تاریخ نا غٹ آن بھلا ریلیف پیکج اس تننگ ءِ۔ ہفتہ نادے آ پاکستان تحریک انصاف نا مرکزی میڈیا ڈیپارٹمنٹ آن جاری بیان نا رداٹ سینیٹر فیصل جاوید پارے کہ ہژدہ می ترمیم نا ڈھنڈورا کروک آک خبر اف ہرانگ غیب ءُ، غٹ صوبہ غاک وتواجہ ءُ، تینا تینا کاریم تے کننگ ءُ ولے سندھ کاریم کپننگ ءِ ، بلاول زرداری خورک نعرہ غاتیان مون آ ہِنپننگ ءِ، سندھ انا خلقی آبادی بے کچ نیزگاری ٹی ءُ۔ اوپارے کہ سندھ انا نیزگار آتے کن ہم پیکج بیرہ بنجاتسنے، پین تو پین بلاول ءِ سندھ انا دارالخلافہ کراچی نا ہم ہچ سمااف، ماڑی تیٹی رہینگوک آ بلاول انت وخت اس مچھر کالونی آ ہنانے؟ اوپارے کہ انت بلاول ءِ لیاری ٹی رہینگوک آتا حال انا سماارے کاریم عملی گام گیج ہرفنگ آن مریک، پریس کانفرنس یا ٹویٹس کننگ آن آخا، دوتفنہ پانہ کہ خدارا نیزگار الس آ رحم واوفتا احساس ءِ کے۔ سینیٹر فیصل جاوید پارے کہ ہمو احساس ہرا وزیراعظم عمران خان نا ہر فیصلہ ہر گام آن نمان سروشک تننگ ءِ، وزیراعظم نیزگار آتے کن ملکی تاریخ نا غٹ آن بھلا ریلیف پیکج اس تننگ ءِ۔
