اسمگلنگ ملکی زرگزران کن ناسور، کوڑی کننگ و ناروا کٹیا خوری نا برخلاف سخت ترین ایکشن المی ءِ، توننگ کن انٹیلی جنس ایجنسی تا خذمت ءِ دوئی کننگے، وزیراعظم عمران خان نا دیوان اٹی گپ وتران
اسلام آباد۔ 17اپریل (اے پی پی) وزیراعظم عمران خان پارینے کہ اسمگلنگ ملکی زرگزران کن ناسور، کوڑی کننگ و ناروا کٹیا خوری نا برخلاف سخت ایکشن المی ءِ، دانا توننگ کن انٹیلی جنس ایجنسی تا خذمت ءِ دوئی کننگے، صوبہ غاتون کوارڈینیشن ءِ پین گچین کننگے، ملخ آتا مون ءِ توننگ و اوفتا چٹفنگ کن پورو تیاری کننگے، دا چرجوئی ٹی فنڈز انا فراوانی ءِ پک کننگک۔ داخیال آتا درشانی ءِ او اسمگلنگ نا توننگ، کوڑی کننگ نا برخلاف کریک ڈاؤن و ملخ آتا چٹفنگ نا بابت گام گیج آتیا جاچ دیوان نا کماشی ءِ کرساکرے۔ دیوان اٹی وزیر داخلہ بریگیڈیئر(ر) اعجاز شاہ، وزیر نیشنل فوڈ سیکورٹی سید فخر امام، وزیر ڈٹ بندی اسد عمر، وزیر اقتصادی امور مخدوم خسروبختیار، سلاہکار خزانہ ڈاکٹر عبدالحفیظ شیخ ، خصوصی کمکار ڈاکٹر فردوس عاشق اعوان، چیئرمین این ڈی ایم اے لیفٹیننٹ جنرل محمد افضال و سینئر آفیسر آک ساڑی ئسر۔ اسمگلنگ نا توننگ و کوڑی کروک آتا برخلاف کریک ڈاؤن، خاص وڑاٹ کوڑی کننگ نا برخلاف درستی راستی کرفوک آ آرڈیننس نا سوب و ایلو گام گیج مثلا سیم تے سیل کننگ نا سوب آن سمگلنگ اٹ نمان کمتی نا بابت بشخ ہلوک آتے حوال تننگا۔ وزیراعظم عمران خان دیوان آن تران کرسا پارے کہ اسمگلنگ ملکی زرگزران کن ناسور اسے۔ ہنداوڑ کوڑی کننگ و ناروا کٹیا خوری نا برخلاف سخت ترین ایکشن المی ءِ۔ داوڑنا سرجزآتے ٹی اوار زموار آتا دمدستی پیدواری ءِ کرسا اوفتے کانود نا رداٹ سخت سزا تننگے تانکہ داوڑنا روش نا حوصلہ شکنی مرے۔ اوپارے کہ اسمگلنگ و کوڑی کننگ نا سوب آن گڑاتا مصنوعی کاختی و نہاد آتے ٹی ناروا ودکی نا بھاریم ءِ نیزگار الس سگک۔ اسمگلنگ و کوڑی کروک آتا پیدواری و ودانا توننگ کن انٹیلی جنس ایجنسی تا خذمت آتے دوئی کننگے۔ وزیراعظم پارے کہ تعلقدارمحکمہ تینا دیانتدار و فرض شناس آفیسر آتے ہموجاگہ غاتیا تعینات کیر ہراڑے اسمگلنگ و کوڑی کننگ نا گڑتی مرے۔ اوپارے کہ دارداٹ صوبہ غاتون کوآرڈینیشن ءِ پین گچین کننگے۔ حالیت آتا ہڑدے ئی بنداو آ مانیٹرنگ ءِ کننگے و ہچ وڑنا انتظامی اڑاند بننگ کن ہلنگپ۔ ملک اٹی خولم نا فراوانی، بروک آ سال خولم نا دوئی کننگ ناہدف، کشارگر آتے باردانہ نا فراوانی نا بابت بشخ ہلوک آتے حوال تننگا۔ وزیر نیشنل فوڈ سیکورٹی حوال ترسا پارے کہ پاسکو و پنجاب حکومت نا خولم نا دوئی کننگ کن وخت آ گام گیج برجاءِ۔ داچرجوئی ٹی ایلو صوبہ غاتے خولم نا دوئی کننگ کن گچین گام گیج ہلنگ نا گرج ءِ۔ تدوک آ سال 40لکھ ٹن خولم دوئی کننگا۔ داسال نا ہدف 82لکھ ٹن ءِ۔ خولم نا دوئی کننگ اٹ پین ترندی اتنگ نا گرج ءِ ولے ساڑی آ پِرتا سوب آن مشکل مون تروک مس۔ وزیراعظم خولم نا ہدف آتا وخت آ دوئی کننگ و ملک اٹی خولم و نُت انا الس کن فراوانی ءِ ہرحال اٹ ممکن کننگ کن اسہ جامع و گچین ءُ حکمت عملی اسے نا گرج آ زور شاغسا پارے کہ دا ہیت آ پدریسہ و پبی چکار کننگے۔ بشخ ہلوک آتے ملخ آتا چٹفنگ نا بابت ملک اٹی برجا ایمرجنسی نا رداٹ داوخت اسکان کروک آ گام گیج و آخبت نا لائحہ عمل آ معلومدار کننگا۔ دیوان اٹی ملخ آتا چٹفنگ کن صحراتیٹی ہوائی جہاز وکھیت آتے ٹی مشین تا کمک اٹ اسپرے تون تعلقدار باندات آتیا ہم سرجم سجفنگا۔ دیوان ءِ پاننگاکہ ملخ آتا چٹفنگ کن چین آن جہاز و مشینری بٹنگ انگانے ولے دا رداٹ پین جہاز و مشینری درکار ءِ۔ دارداٹ گام گیج چست کننگ انگ ءِ۔ حوال اٹی پاننگاکہ کوروناوائرس نا سوب آن ملخ آتا چٹفنگ نا بابت مشینری تا وخت آ دوئی کننگ سست روی نا گواچی مس ہرانا دمدستی ازالہ ءِ کننگ انگ ءِ۔ وزیراعظم عمران خان کوروناوائرس آن پد ملخ آتے ملک انا اسہ اہم ءُ ویل اس گوندسا پارے کہ ملخ آتا مون ءِ توننگ و دافتا چٹفنگ کن پورو تیاری و دابابت ہروڑنا اڑاند و مشکل آتے دمدستی مر کننگے۔ وزیراعظم ملخ آتا چٹفنگ کن درکار فنڈ انادمدستی فراوانی و جامع حکمت عملی آ عملدرآمد ءِ پک کننگ نا پارت کرے۔ اوپارے کہ ملخ آتا چٹفنگ نا بابت ملک اٹی مہالو آن ایمرجنسی نافذ ءِ، دا چرجوئی ٹی فنڈز آتا فراوانی ءِ پک کننگک۔
