الس ءِ معاشی مشکل آنی رد ءَ آیوکیں گامگیج رد ءُ بند دیگ بوھگ ءَ انت، احساس کیش ایمرجنسی پروگرام توامیں سیاسی سیادی آں چہ برزتر بوھان ءَ ساپ ءُ سلہ ایں بنیاد ءَ چلائینگ بوھگ ءَ انت۔ کورونا ریلیف ٹائیگر فورس ءَ ھوار بوھگ ءِ ھوالگ ءَ ورنا آنی جوزگ لائک ءِ ستا انت، مزن وزیر عمران خان

اسلام آباد ۔ 15 اپریل (اے پی پی) مزن وزیر عمران خان ءَ گوشت کہ الس ءِ معاشی مشکل آنی رد ءَ آیوکیں گامگیج رد ءُ بند دیگ بوھگ ءَ انت احساس کیشن ایمرجنسی پروگرام توامیں سیاسی سیادی آں چہ برزتر بوھان ءَ ساپ ءُ سلہ ایں بنیاد ءَ چلائینگ بوھگ ءَ انت۔ کرونا ریلیف ٹائیگر فورس ءَ ھوار بوھگ ءِ ھوالگ ءَ ورنا آنی جوزگ لائک ءِ ستا انت، سیاسی سروک سیر لاپیں مردم آنی کرا برونت ءُ گریب آنی واستہ چند جم کنگ ءَ وتی کرد ءَ پیش بدار انت۔ اے ھیالانی درشانی آئی ءَ چار شمبے ءِ روچ ءَ پی ٹی آئی ءِ بنجاھی نائیب صدر ءُ سندھ اسمبلی ءَ پی ٹی آئی ءِ پارلیمانی لیڈر حلیم عادل شیخ ءَ گوں گند ءُ نند ءِ ساھت ءَ کت۔ حلیم عادل شیخ ءَ مزن وزیر ءَ را کورونا وائرس ءِ رد ءَ صوبہ سندھ ءِ ھواریں جاور ھال ءُ الس ءِ استیں جیڈھ آنی ھوالگ ءَ سرپد کت۔ مزن وزیر عمران خان ءَ گوشت کہ احساس کیش ایمرجنسی پروگرام توامیں سیاسی سیادی آں چہ برزتر بوھان ءَ ساپ ءُ سلہ ئی ءَ چلائینگ بوھگ ءَ انت۔ مشکلیں وھد ءَ بنجاھی حکومت سرجمیں ملک ءِ الس آناں ریلیف پجاری کنگ ءِ ھمک رنگیں کوشست کنگ ءَ انت۔ آئی ءَ گوشت کہ السانی سکیں وھد ءِ بابت ءَ شر سما انت۔ حلیم عادل شیخ ءَ گوشت کہ صوبگ سندھ ءِ الس مشکلیں وھد ءَ بنجاھی حکومت ءِ نیمگ ءَ احساس کیشن ایمرجنسی پروگرام ءِ چیر دستی ءَ رستگیں مالی کمک ءِ پد ءَ مزن وزیر عمران خان ءِ شگر ءُ منت وار انت۔ گرانیں ءُ سکیں وھد ءَ ابید اربانی کلدار ءِ پیکج پجاری کنگ ءِ ھاترا مزن وزیر ءَ را توسیپ ءُ ستا پیش کنت۔ آئی ءَ گوشت کہ زمینی راستی آنی رد ءَ جوڑیشت ءُ ایکسپورٹ انڈسٹری ءِ ھوالگ ءَ وھد ءُ موہ ءِ سر ءَ پیسلہ زورگ ءِ پد ءَ بنجاھی حکومت ءِ شگر ءُ منت وار آں۔ آئی ءَ گوشت کہ سرجمیں صوبگ ءِ ورنا کارونا ریلیف ٹائیگر فورس ءِ بھر جوڑ بوھگ ءِ واستہ سک باز واھگ ءُ واھشت دار انت۔ ریلیف پجاری کنگ ءِ کوشست ءَ سندھ ءِ ورنا درستاں چہ دیمتر انت ءُ مزن وزیر ءِ گوما ھمکوپگ جوڑ بوھگ ، پاکستان تحریک انصاف سندھ ءُ ایشی ءِ سروکی مشکلیں وھد ءَ صوبگ ءِ الس ءَ را ایوک یل نہ کنت ءُ مزن وزیر عمران خان ءِ کوشست آنی گیشاں چہ گیش ھمبراھ داری ءَ کنت۔