اسلام آباد۔ 14اپریل (اے پی پی) وزیراعظم عمران خان ورناتے بھلو کاروباری وارخواہی تننگ کن پین آسراتی فراوان کننگ نا فیصلہ ءِ کرسا پارے کہ لاک ڈاؤن اٹی نرمی بننگ تون ورناتے کاروباری پڑاٹ مون آ اتیر، ورناک ملک انا میرات ءُ اوفتیا پین زرکاری کینہ۔ ملکی زرگزران ءِ سنبھالنگ اٹ ورناتا کڑد ہم اہم مریک۔ داخیال آتا درشانی ءِ سے شنبے نادے آ سلاہکار خزانہ حفیظ شیخ و خصوصی کمکار عثمان ڈار تون اوڑدہی ٹی کرے۔ وزیراعظم عمران خان ورناتے بھلوکاروباری وارخواہی تننگ کن پین آسراتی فراوان کننگ نا فیصلہ ءِ کرسا سرسہب ورناپروگرام نا رداٹ تروک آ پیسہ غاتے ودفنگ نا منظوری ءِ تسنے۔ داپروگرام نا رداٹ ورناتے 50لکھ انا جاگہ غا دونیم کروڑ روپئی اسکان نا زرملک۔ داپیسہ غاتیا واجب الادا شرح سود ہم 8درسد آن کم کننگ نا فیصلہ ءِ کننگانے۔ وزیراعظم حالیت آتا گچین مننگ تون ورناتے ٹی زر انا بشخنگ نا عمل ءِ ترند کننگ نا پارت کرینے۔ پاکستان نا غٹ بینک آتے سرسہب ورناپروگرام اٹ اوار کننگ ناہم منظوری ءِ تسنے۔ وزیراعظم عمران خان پارے کہ ورناتے پین آسراتی ایتر تانکہ بھلو کاروبار اس کننگ کیر۔ لاک ڈاؤن اٹ نرمی بننگ تون ورناتے کاروباری پڑاٹ مون آ اتیر۔ اوپارے کہ ورناک ملک انا میرات ءُ اوفتیا پین زرکاری کینہ۔ ملکی زرگزران ءِ سنھبالنگ اٹ ورناتا کڑد ہم اہم مریک۔
