اسلام آباد۔ 14اپریل (اے پی پی) بنجائی کابینہ ءِ تعمیرات نا بشخ اٹی آسانی تننگ، کوڑی کننگ و اسمگلنگ نا توننگ و افراط زر انا مون ءِ توننگ کن اِرا آرڈیننس نا بابت حوال تننگا، آرڈیننس اٹ کوڑی کروک و اسمگلنگ کروک آ بندغ آتے کن سخت سزا سلاہ کننگانے، دا حکومت نا ناروا کٹیا خوری و کوڑی کننگ نا تورسا وزیراعظم عمران خان نا ویژن نا رداٹ ریلیف شیفکو کہول آ سرکننگ کن اسہ کانودی کوشست اسے، وزیراعظم دا عزم ءِ دوارہ پارے کہ پاکستان نا الس نا ڈکھ آتا مداوا ءِ کننگ کن عملی گام گیج آتون اوار اوار 22کروڑ الس ءِ کروناوائرس آن بچفنگ ننا اولیت ءِ، بنجائی کابینہ سرسہب ایمرجنسی کیش ٹرانسفر پروگرام اٹ 100درسد شفافیت ءِ برقرار تخنگ آ خصوصی کمکار راجی رکھ و تخفیف نیزگاری ثانیہ نشتر ، کیش منتقلی ٹی راجی فاصلہ و طے مروک ایس او پیز آتیا عملدرآمد آ صوبائی سرکڑدہ و ضلعی حکومت آتا کوشست آتا ستاءِکرے۔ سے شنبے نادے آ وزیراعظم عمران خان نا کماشی ٹی بنجائی کابینہ نا دیوان آن پد وزیراعظم نا خصوصی کمکار حوالکاری و شینکاری ڈاکٹر فردوس عاشق اعوان میڈیا ءِ حوال ترسا پارے کہ وزیراعظم نا پارت آ تعمیرات نا بشخ اٹی آسانی فراوان کننگ کن وزیراعظم نا پارت آ آرڈیننس اس اتنگ انگ ءِ، کوڑی کننگ و اسمگلنگ نا توننگ تون اوار اوار افراط زر ءِ کنٹرول کننگ و المی گڑاتا فراوانی ءِ پک کننگ کن وزیراعظم نا پارت آ آرڈیننس اٹ کوڑی کروک و اسمگلنگ کروک آ بندغ آتے کن سخت سزا سلاہ کننگانے۔ بنجائی کابینہ کمیٹی کانودجوڑ کننگ نا مسہ اپریل نا فیصلہ، اقتصادی رابطہ کمیٹی نا ہشت و نہہ اپریل نا فیصلہ غاتے پک کرے۔ کابینہ ءِ پاننگاکہ دا دیوان اٹی مروک آ فیصلہ غاتا رپورٹ وزیراعظم آفس ءِ رسینگانے۔ کابینہ مرغزار چڑیاگر نا بست وبند وائلڈ لائف بورڈ انا حوالہ کننگ نا منظوری ءِ ہم تس۔ احساس پروگرام نا رداٹ ایمرجنسی کیش منتقلی پروگرام نا بابت وزیراعظم عمران خان پارے کہ پروگرام غٹ تر سیاسی وابستگی تیان ایڑتر مرسا میرٹ آ بناکننگانے ہرانا مسخت حق حقدار آتسکان سرکننگ نا ءِ۔ بنجائی کابینہ نا باسک آک تینا تینا حلقہ غاتے ٹی کیش پروگرام نا رداٹ پیسہ غاتے جوان وڑاٹ بشخنگ نا بابت معلومدار کرے۔ بنجائی کابینہ ءِ پاننگاکہ احساس پروگرام و ایمرجنسی کیش منتقلی پروگرام اسٹ انگا پروگرام ءِ ہرانا شفافیت و میرٹ آ ہچ کس ءِ شک اف۔ دا پروگرام بنجانا کڑد ءِ سوگو کرسا ہرچار آ صوبہ بشمول آزاد جموں کشمیر، گلگت بلتستان اٹ ضرورت مند آتا رسینگ ءِ پک کننگ ءِ۔ کابینہ ءِ پاننگاکہ 8171نا کمک اٹ ہرکس کہ میسج نا کمک اٹ حقدار مریک ، پک کننگ آن پد اودے کیش وصولی نا سرجم آتے گدریفنگک۔ وزیراعظم عمران خان پارے کہ پاکستان نا تاریخ اٹی دُن ءُ پروگرام بتنے ہرا سیاسی اثرورسوخ آن پاک ءِ، اوثانیہ نشتر ءِ پارلیمنٹرین تون گچین رابطہ غاتے پک کننگ آ زور شاغا۔ بنجائی کابینہ ءِ پاننگاکہ ایمرجنسی کیش منتقلی پروگرام نا ڈٛیٹا ویب سائٹ نا کمک اٹ لس کننگ تون اوار اوار ضلعی کہول آ ہم فراوان کننگک۔ الس آسراتی کن فوکل پرسن مقرر کننگ انگ ءِ، داپروگرام نا بناآن داوخت اسکان کیش اٹی کٹوتی کننگ آ زموار آتا برخلاف مقدمہ درج کرفنگانے۔ کروناوائرس نا بابت کابینہ ءِ معلومدار کننگاکہ دنیا ٹی کہوک و زہمی تا کچ آن شون ہلوک آ ملک آک مون تننگ آن قاصر ءُ ولے پاکستان تینا کچ اٹنگا وسیلہ غاتے اٹ دا دین ءِ شکست تننگ کن دے و نن کاریم کننگ ءِ۔ آگاہی تون گنڈوک احتیاط نا جزو آ عمل کرسا دین انا مون ءِ توننگ کینہ۔ خصوصی کمکارڈاکٹر فردوس عاشق اعوان پارے کہ قومی رابطہ کمیٹی صوبہ غاتون ملک اٹی پائیدار روڈ میپ اس مون آ اتنگ کن کاریم کننگ ءِ۔ داوخت اسکان نا این سی سی ٹی صوبائی حکومت آتا امنائی نا قومی نوعیت نا فیصلہ غاتے شیفکو کہول آ گدریفنگک۔ اوپارے کہ ایمرجنسی کیش پروگرام نا پورٹل نا بناءِ زوت وزیراعظم عمران خان کیک۔ دا پورٹل آن ہر شاری ءِ دا پروگرام نا بابت معلومداری، ڈیٹا، کیش گدریفنگ نا سرجم آک ملرہ۔
