اسلام آباد۔ 14اپریل (اے پی پی) وزیراعظم نا خصوصی کمکار حوالکاری وشینکاری ڈاکٹر فردوس عاشق اعوان پارینے کہ سہب انا ہشت بجہ غان پی ٹی وی ٹیلی اسکول نشریات آتا باقاعدہ بناءِ کننگانے، وزارت تعلیم و حوالکاری نا شریداری اٹ بناکروک آ دا ڈٹ وزیراعظم عمران خان نا ملک اٹی تعلیم نا مون آ دنگ نا وژن نا درشانی ءِ، کورونادین انا سوب آن چناتا تعلیمی عمل معطل ءِ، دا چینل نا کمک اٹ اُراٹی تولوک چناک و ایلو طالب علم آک خوانفنگ نا عمل آن فائدہ ہرفرہ، نشریات آتا وخت ءُ پاس سہب انا 8بجہ غان شام انا 6بجہ اسکان مریک۔ خصوصی کمکارڈاکٹر فردوس عاشق اعوان سے شنبے نادے آ تینا ٹویٹ اٹی پارے کہ اول آن دُوانزدہ جماعت اسکان نا طالب علم آک داڑآن فائدہ ہرفرہ۔ ٹیلی اسکول آن ہموچناک ہم فائدہ ہرفرہ ہراسوب اسے آن اسکول آہِننگ کپسہ، اُراٹی تولوک بندغ آتے تعلیم نا زیور آن آراستہ کننگ نا دا ڈٹ مچ آ ملک اٹی خواندگی نا مون آ دننگ اٹ ہم ثابت مریک۔ اوپارے کہ ٹیلی اسکول نانشریات آتے سیٹیلائٹ و اینٹینا ہڑتوم آتا کمک اٹ ہُننگ مریک۔ مرمر انگا علاقہ غاتا چناک و طالب علم دا تدریس و تربیت نا عمل آن فائدہ ہرفنگ کیرہ۔
