بھارتی فوج انا تدوک آ 24گھنٹہ ٹی سیز فائر لائن و جہانی کنونشنز نا خلاف ورزی ، قصدالائن آف کنٹرول نا بروہ، دھدنیال، رخچیکری و چیری کوٹ سیکٹرزاٹی شاری آبادی آ بے خار سم کاری، اِراسال انا نابالغ چناس شہید وخت اس کہ 72سال انا بزرگ و زالبول اسے تون اوار 4بندغ ٹھپی

راولپنڈی۔ 13اپریل (اے پی پی) بھارتی فوج تدوک آ 24گھنٹہ ٹی سیز فائر لائن و جہانی کنونشنز نا خلاف ورزی ءِ کرسا رزاک اٹ لائن آف کنٹرول نا بروہ، دھدنیال، رخچیکری و چیری کوٹ سیکٹر آتے ٹی شاری آبادی ءِ نشان کرے، بے خار سم کاری ٹی اِراسال انا نابالغ چناس شہید وخت اس کہ 72سل انا بزرگ و زالبول اسے تون اوار 4بندغ ٹھپی مسر۔ پاک فوج انا شعبہ تعلقات عامہ (آئی ایس پی آر) نا ڈائریکٹر جنرل میجر جنرل بابر افتخار نا ٹویٹ نا رداٹ لائن آف کنٹرول تون چندی سیکٹرآتیا بھارتی فوج انا بے خار سم کاری آ پاک فوج انا ورناک گچین وڑاٹ ورندی تسر و ہموبھارتی چوکی تے شست کریر ہراکان سم کاری نا بناءِ کننگاسس۔ بھارتی فوج انا کنڈآن بھلوسلہہ و مارٹرآتا بے خار سم کاری ٹی دھدنیال سیکٹر اٹی اِراسال انا نابالغ محمد حسیب شہید مس وخت اس کہ بروہ ، رخچیکری و چیری کوٹ سیکٹر اٹی سم کاری آن 72سال انا بزرگ و زالبول اسے تون اوار 4بندغ ٹھپی مسر۔ ٹھپی تے المی طبی امداد کن خڑک انا جان جوڑی ہند آ گدریفنگانے۔