کوروناوائرس نا برخلاف برسرپیکار مچ آ ملک انا ہسپتال آتا طبی عملہ کن رکھی گڑافراوان کننگانے، لیفٹیننٹ جنرل محمد افضل

اسلام آباد۔ 13اپریل (اے پی پی) نیشنل ڈیزاسٹرمینجمنٹ اتھارٹی نا چیئرمین لیفٹیننٹ جنرل محمد افضل پارینے کہ کوروناوائرس نا برخلاف برسرپیکار مچ آ ملک اناہسپتال آتا طبی عملہ کن رکھی گڑاتے فراوان کننگانے، جندی رکھ انا گڑاتا ہندی کہول آ تیاری نا بناءِ کننگانے، ملک اٹی ہڑدے ئی 50ہزار ٹیسٹ کننگ نا لائخی دوئی کرینن، پین لیبارٹری ہم جوڑ کننگ انگ ءِ۔ داخیال آتا درشانی ءِ او دوشنبے نادے آ داڑے ڈبلیو ایچ او نا کنڈآن طبی گڑاتا فراوانی نا وخت آ تران کرساکرے۔ اوڈبلیو ایچ او نا منتواری ءِ ہرفے و پارے کہ نن کوروناوائرس نا توننگ کن غٹ المی گام گیج آتے چست کرینن۔ دا چرجوئی ٹی پیشن نا ملک آن پاکستان یا پاکستان آن پیشن نا ملک ہن و بر ءِ پورووڑاٹ کنٹرول کرینن۔ اوپارے کہ کوروناوائرس نا برخلاف برسرپیکار طبی عملہ نا رکھ اکن گڑا و ازباب آتا دوئی کننگ اسہ چیلنج اس ئس، گڑاس گڑا نن چین آن درآمد کرینن۔ اوپارے کہ اولیکو دے تیٹی 13مارچ آن 27مارچ اٹی ننے دابابت مشکل مون تروک ئس ولے اینو نن این 95ماسک آن بیدس جندی رکھ انا اسہ گڑاس ہم درآمد کپننگ اُن و دا غٹ گڑاتے داسہ نن ہندی مارکیٹ آن ہلنگ اُن۔ اوپارے کہ آب انا رداٹ ءُ۔ نن فرنٹ لائن ڈاکٹرز، نرس آتے غٹ المی آ گڑاتے تسونن۔ چیئرمین این ڈی ایم اے پارے کہ نن داسہ ملک انا غٹ ہسپتال آتے اسہ لکھ پی پی ایز ہر ہفتہ تننگ کن تیار اُن و اگہ ضرورت تما تو داکان زیات ہم تننگ مریک۔ اوٹیسٹنگ نا بابت پارے کہ 4مارچ آ ملک اٹی 14لیبارٹری ئسر و800ٹیسٹ کننگاکہ ولے اینو نن فیصلہ کرینن کہ بیرہ ہمو خلقت نا ٹیسٹ ءِ کننگپک ہرافتے ٹی علامت مریک بلکن لاک ڈاؤن کروک آ علاقہ غاتے ٹی غٹ انا ٹیسٹ ءِ کینہ تانکہ خلقت زہمی مفس و تینا ہڑدے آنبار زند ءِ تیر کننگ کیر۔ اوپارے کہ صوبائی حکومت آتے ہم داوڑنا ٹیسٹ انا بست و بند ءِ کننگ نا سلاہ ایتنہ و درکار غٹ گڑاتے فراوان کینہ۔ داوخت آ ننا 39لیبارٹری کاریم کننگ ءُ۔ 27پین لیبارٹری آ کاریم کننگ اُن۔ اوپارے کہ نن وخت اٹ کچ ءِ ودفنگ اُن۔ 100آن زیات موبائل لیبارٹری ہم جوڑ کننگ انگ ءِ۔ اوپارے کہ نن وینٹی لیٹرز اپریل نا ایسر اسکان 2500وینٹی لیٹر آتا بست وبند ءِ کننگ کن لائحہ عمل اس طے کرینن۔ دا بابت ہروڑنا گام گیج کننگ انگ ءِ۔ ڈبلیو ایچ او نا کنڈآن تروک آ گڑاتیٹی 15ٹیسٹنگ مشین و 15ہزار کٹس اوار ءُ۔ داکان مست ڈبلیو ایچ او نا نمائندہ پارے کہ دا جہانی ادارہ جان جوڑی نا کنڈآن پاکستان کن کوروناوائرس تون مون تننگ کن کمکاری نا فراوانی نا بشخ اسے۔ نن این ڈی ای و این آئی ایچ نا کمک اٹ حکومت پاکستان تون کمک کننگ اُن۔ اووزیراعظم عمران خان و اونا حکومت نا کنڈآن کروناوائرس تون مون تننگ کن کوشست آتا ستاءِ کرسا پارے کہ جہانی ادارہ جان جوڑی پاکستان نادا بابت کمکاری ءِ برجاتخک۔ این آئی ایچ نا ایگزیکٹو ڈائریکٹر میجر جنرل عامر اکرام داوخت آ گپ وتران کرسا جہانی ادارہ جان جوڑی نا منت واری ءِ ہرفے و پارے کہ کوروناوائرس تون مون تننگ کن اسیجا کوشست آتا گرج ءِ۔ دابابت گام گیج کننگ انگ ءِ۔ اوپارے کہ پین گڑاتا دوئی کننگ و ولدا اوفتا گچین کاریم اٹ اتنگ ءِ پک کننگ کن ممکن میکنزم اس جوڑ کننگانے۔